Segun resumen diario di Departamento di Salubridad Publico di Aruba, DVG, relaciona cu e cifranan di e transcurso di pandemia di Covid-19 na Aruba, ayera a registra 96 caso activo.
Segun resumen di ayera di DVG, ayera tabatin 9 persona cu a recupera. Tambe a registra un total di 13 caso activo nobo di Covid-19, e malesa causa pa e virus SARS-CoV-2, di cual 2 no ta residente. Cu esaki, e cantidad di caso activo ayera a keda na 96 persona.
Igualmente a informa cu e cantidad di fayecido relaciona cu Covid-19 ta 101 fayecido.
Ademas, DVG a informa cu e cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 674 test. Tasa di positividad, (‘positivity rate’) entre nos residentenan ta 13 %. Organisacion Mundial di Salud (WHO) ta recomenda pa keda haci mas test posibel te cu yega na un tasa di positividad di 5%, loke nan ta considera ta indica cu e pandemia ta bao control.
Di su banda, Hospital Dr. Horacio Oduber a informa cu tin un total di 9 persona interna pa ricibi tratamento pa Covid-19. Di esakinan, 6 ta den Unidad di Cuido Intensivo (ICU) mientras tres ta isola riba unidad general di covid.
