Ambos grandi… Kier goberna nan so…?

Un cantidad record di partido politico pa eleccion proximamente. Esey ta, si tur logra haya e firmanan di apoyo necesario. Nos no mester specula ta ken ta logra esey, nos ta desea nan tur exito. Sin embargo, e situacion unico aki caba ta haci cu nos mester puntra nos mes si e diversidad grandi aki ta bay yuda. Naturalmente ta asina cu ningun partido a cuminza grandi; semper tabatin un reunion inicial unda un grupo chikito di hende ta dicidi e promer paso cu ta conduci na un partido politico. E crecemento lo mester bin despues, si tabatin exito den e promer eleccion na cual ta participa. Pero, tambe aparentemente no tin tanto confianza entre esnan cu a tuma iniciativa pa lanta un partido pa acerca otronan cu tin e mesun idea, pa haci algo conhuntamente.

Por ta cu den cierto caso esey a sucede pero cu nos no ta na altura. Por ta cu e ideanan riba cual kier basa un partido politico no ta cuadra tanto cu otronan, aunke nos no ta tende tanto di diferencia ideologico, pasobra di tur manera esey no ta algo cu ta interesa ni e publico ni e politiconan mes. Nos tin algun di e partidonan di mas edad cu ta miembro di un asociacion internacional cu un ideologia explicito, pero esey tampoco ta garantia cu e ideologia ey ta bin dilanti regularmente, ni den expresion publico, ni den nan actuacion. Esey ta haci cu den practicamente tur caso nos ta tende e mesun metanan strategico y general, sin tanto profundizacion den e temanan. Ta di spera cu den e simannan nos dilanti bin mas claridad y detaye den esey,si no ta bira mas bien un escogencia a base di simpatia cu e personanan cu ta lidera e partido.

Di tur manera, nos ta den porta di eleccion y e partidonan nobo y chikito casi tur tin un cos en comun: nan no ta kere cu Aruba mester sigui scoge pa un gobierno cu ta di un partido so, cualkier di e dosnan, o un gobierno di coalicion cu un di e gradinan aki na cabez. Mira e dos partidonan grandi goberna hunto ta parce keto bay un bon manera pa pone un sonrisa sarcastico riba cara di hopi hende; practicamente ningun hende ta mira esey bira realidad, nan mes tampoco. E debate kico ta mihor, gobierno di un solo partido, o coalicion, tambe ta parce nos di bira algo obsoleto. Si nos mira back den pasado, ta dificil pa bisa si un di e dos formanan a haci un mihor trabao. E experiencia ta mustra cu den tur forma di goberna tabatin problema grandi, promer cu e coalicionnan, despues e experiencia duro di e gobiernonan unipartidista, cu pa hopi hende no a resulta. Ta pesey tambe cu tanto na 2009 como na 2017 nos a mira un grupo grandi di votador cu a pasa pa e otro banda cu nan voto, habriendo paso pa otro gobierno. E pregunta cu ta surgi actualmente si nos tin un situacion unda por spera un ‘voto di castigo’ atrobe, loke naturalmente ta deseo di e partido grandi den oposicion.

Esaki no ta materia facil. E actual gobierno demisionario tabatin un inicio dificil, unda mester a coregi e rumbo financiero pesimo den cual e pais tabata bay. A haci bon trabao di aumenta entrada, aumento di BBO pa paga AZV y proyecto PPP, pero no a reduci gasto (di personal) cu mesun diligencia, mientras cu esey tabata e tarea. No coba den cartera di hende sin duna nada back. Despues, cu mihor perspectiva, e crisis di coronavirus a bin. Ora bo ta gobierno den un crisis, bo mester actua pero hasta bon trabao no ta garantia pa exito. A maneha e crisis relativamente bon, mas den sentido di salud, pero mester a tuma medida pa corta gasto. Loke pa decadas ningun partido tabata kier a haci, a sucede. A corta salario y lo tin hende cu a keda cu resentimento, principalmente den e aparato publico. Di otro banda, mayoria di hende ta traha den sector priva y a perde trabao of a mira nan salario baha sustancialmente, pero a mira cu a tuma medida pa tene mas tanto hende na trabao. Ta dificil pa haya un bon impresion con esaki lo resulta dia di eleccion.

Di otro banda, e contrincante tradicional tin un problema grandi di credibilidad. Ta obvio cu nan ultimo gobierno tabata uno sin norma y sin control riba kico e mandatarionan tabata haci y esey a resulta den varios ministro cu no mester di programa nan bida den e proximo añanan; husticia lo haci esey pa nan. Y te ainda ni un palabra di reconocimento, e lider ta haci manera nada no a pasa – “un par di ministro cu mester bay cera, esey no mester ta un problema” – esey ta su pensamento y mensahe, pero ta dificil imagina cu esaki lo convence tanto hende pa duna e partido e confianza cu nan a perde cuatro aña pasa, tambe pa e desastre financiero cu nan a laga atras. Resultado di 25 di juni no ta sigur, ni pa pa partido grandi ni pa e chikitonan, Di otro banda, e deseo di e grandinan pa bolbe goberna nan so, cu un mayoria absoluto, ta parce un deseo remoto.