Mi ta determina pa hiba e pais aki dilanti y nicuantolodo nan tira nan, no lo bay lograkibra mi. Aruba ta den temporada di campaña pa Eleccion 2021 dia 25 di juni benidero. Durante campana hopi cos ta pasa, nos ta mira cu tur partido ta probecha di e oportunidad pa papia di nan vision y nan ekipo y tin otro partidonan ta tuma e rumbo destructivo y ta prefera di ataca y critica otro cu mentira sin splica kico ta nan plan. Prome Minister Evelyn Wever-Croes, contestando un pregunta cu el a ricibi durante un rueda di prensa pa lansa un candidate nobo riba lista di MEP, a aclaria e documento cu e partido di oposicion ta partiendo rond cu su potret y potretnan di miembronan di su famia y otro personanan cu no ta den su famia pero cu ta conoci y hopi aprecia pa Prome Minister.

Cu e document aki, e partido AVP kier pone un ‘link’ cu e unico cos cu mi a bin pa haci ta pa faborece famia. Esaki sigur no ta berdad. Na e momento cu un partido cu antes tabata grandi, ta haci esaki bo sa cu nan ta desespera y ta trece cos dilanti sin argumento”, Prome Minister a enfatisa.

E documento, cu ta wordo parti den un saco berde hunto cu e programa di AVP cu porcierto no tin contenido pa soluciona e situacion cu e pandemia a cuasa nos pais, ta cuminsa cerca Prome Minister.

TATA DI PROME MINISTER: Nan ta referi na e tata di Prome Minister insinuando cu Señor Croes ta traha pa Prome Minister. E informacion aki ta falso y incorecto pasobra como Prome Minister nunca Señora Evelyn Wever-Croes a haci uzo di servicionan di oficina di abogado di su tata. AVP ta insinuando esaki sin cu nan no tin niun prueba pa demostra esaki pasobra no tin tampoco.

Dus pa constant ta hincami tata den e cosnan aki ta un muestra di cobardia. Mi tata ta un persona cu mas di 50 aña ta abogado aki na Aruba. El a haci loke e mester a haci den su bida y ami a drenta den politica pa haci loke ami mester haci den mi bida. Pues esaki no tin niun berdad na dje”.

CASA DI PROME MINISTER: Riba e documento di mentira cu oposicion ta yega cas decente di nos Arubianonan cu ne, ta sigui e casa di Prome Minister y aki Premier Wever-Croes a duna di conoce cu su casa ta na cas sin trabou na e momentonan aki y cu Señor Wever no por haña trabou tampoco pa motibo cu e ta casa di Prome Minister y niun hende kier dun’e trabou.

YIU DI PROME MINISTER: Nan ta sigui pa menciona e yiu di Prome Minsiter tambe a wordo beneficia cu un trabou cu un salario halto. Prome Minister a remarca cu su yiu a cuminsa traha na aeropuerto prome cu el adrenta den gobierno y bira Prome Minister por lo tanto e no ta esun cu a yuda pa su yiu haya trabou na aeropuerto y su yiu no ta gana un salario halto tampoco.

PAREHA DI YIU DI PROME MINISTER: E pareha di yiu di Prome Minister, Jeffrey-ann, ta un persona cu Prome Minister a pidi pa laga su trabou fiho cu e tabata tin den sector priva pa bin yuda Prome Minister pasobra como mandatario prinicipal di un pais, e mester hende di confiansa ta traha p’e. Ademas e pagonan cu ta wordo haci ta di acuerdo cu e salarionan den Gobierno.

GLENBERT CROES, PRIMO DI PROME MINISTER: Minister GlenbertCroes ta primo di Prome Minister y riba lista di MEP cu a bay eleccionna 2017. No ta Prome Minister a hinka Señor Glenbert den politica ni den Gobierno. Ta pueblo a pone Señor Glenbert Croes den e posicion aki, y no pasobra e ta famia di Prome Minister, sino pasobra e ta un politico cu a wordo scogi pa medio di votacion. Señor Glenbert Croes a busca dos ruman pa consehe y traha pe, esaki ta su bon derecho pa haci, como e tin pleno confiansa den nan.

JUNIOR CROES Y RUDY CROES:Ni Junior Croes, primo,ni Rudy Croes, omo, ta traha den gobierno como consehero por lo tanto no ta riba payroll di Gobierno.

ENDY CROES: Parlamentario Endy Croes ta un politico riba lista di MEP cu a bay eleccionna 2017 y pa medio di voto el a drenta Parlamento pasobra pueblo a dun’e e sosten, y no pasobra e ta famia,por cierto leu, y no primo di Prome Minister.

JEFFREY DIJKHOF: Jeffrey Dijkhof ta un persona cu fayece, y si ela haya kiosko, no ta for di Prome Minister Evelyn Wever-Croes pasobra e Premier aki no tin autoridad pa duna kiosko ya cu desde cu el a tuma e cartera aki over, el a pasa e mandato pa otorga kiosko na e departamento concerni.

ARLEEN ODUBER: Arleen ta un acto prima di Prome Minister y e tin casi 20 aña ta traha den gobierno. Pues no ta Prome Minister a dun’e trabou den gobierno tampoco.

SANDRA Y JOALLY: Sandra y Joally a bin traha cu Prome Minister pasobranan ta hende di confiansa di Prome Minister. Cu e funccion aki, ta hende di confiansa mester pa traha banda di Prome Minister. Sigur no por pone un di e mas di 400 coordinadornan cu a traha cu Mike Eman bin traha cu Prome Minister Evelyn Wever-Croes kende ta traha traha cu un bureau di 20 persona di confiansa y capas y no mescos cu Mike Eman cu no tawata sa unda pa pone su 400 coordinadornan sinta.

“Sandra y Joally NO ta gana e salario halto ey tampoco. Nan ta wordo paga segun areglo di pago di gobierno. Nan ta traha hopi hopi duro. Ademas, nan a bin cumi y nan lo bay cumi”.

Prome Minister a termina bisando cu e ta lamenta cu un lider di un partido grandi ta recuri na mentira asina baho pa gana eleccion.

“Tur esaki ta un mentira, y mi ta lamenta cu ora un partido grandi of tabata grandi den pasado tin cu recuri na tipo di tiramento di lodo asina. Pa di prome, e ta mustra desespera, ta mustra cu Mike Eman y su Partido no tin vision y ekipo y mucho menos solucion. E ta tristo cu tin hende den e pandemia aki, den e caso aki Mike Eman himself ta cana cu papel di mentira bou su brasa pa parti rond pa colmo sin tene cuenta cu reglanan pa proteha nos pueblo di e virus. Mi ta kere e siman aki mi lo haña hopi mas lodo tira riba mi pero esnan cu conocemi sa, mi ta mama, wela, casa y ruman pero mas cu tur cos mi ta determina pa hiba e pais aki dilanti y ni cuanto lodo nan tira nan, no lo bay logra kibra mi”, Prome Minister di nos pais, Evelyn Wever-Croes a duna di expresa.