(AP) — Administracion di Biden diabierna a retira un propuesta di era di Trump pa expande e cantidad y tipo di data biometrico colecta pa autoridadnan di inmigracion Mericano.
Servicionan di Ciudadania y Inmigracion Mericano (USCIS) a bisa cu e regla proponi entrega pa comentario publico na september lo wordo retira como parti di meta di e administracion nobo di ‘reduci barera y peso inhusto’ riba sistema di inmigracion.
Den un declaracion anunciando e retiro di e propuesta, e agencia a bisa cu Departamento di Seguridad Teritorial (Homeland Security) lo continua colecta data biometrico ‘ora ta apropia’. Esey ta inclui fingerprint y potret di persona aplicando pa bira ciudadano, y scan di iris di wowo pa persona deteni na frontera Mericano.
E propuesta entrega bao presidente Donald Trump, si lo a adopta esaki, lo a permiti USCIS colecta mas tipo di data biometrico, incluyendo print di voz y ADN, di cualkier persona aplicando pa drenta Merca y nan familiarnan, incluyendo mucha.
Administracion di Trump a argumenta cu esaki lo mehora evaluacion di seguridad, yuda reduci fraude y haci sistema di inmigracion mas eficiente, por ehemplo, door di permiti hende pa check status di nan aplicacion usando solamente nan voz. ADN, oficialnan a bisa e tempo ey, lo ser usa pa sigura cu hende tabata miembronan di famia manera ta declara, y no lo keda almacena pa despues.
Pero criticonan a bisa cu e propuesta lo agrega stapnan innecesario na un proceso di inmigracion ya caba dificil, y descurasha hende di hasta busca di yega Merca pa motibo di con intrusivo e coleccion di data lo ta.
