(MedicalNewsToday) – Durante decadas, e causa di obesidad – y e forma mas efectivo pa baha peso – ta suheto di debate fuerte entre cientificonan y profesionalnan di cuido di salud.

Segun un teoria, conoci como e ‘modelo carbohidrato-insulina’, cuminda y bebida cu ta contene cantidadnan grandi di carbohidrato ta causa un aumento den nivelnan di insulina circulando. E hormoon ta pone celnan vet, ‘adipocytes’, warda e exceso di caloria, loke ta reduci e disponibilidad di e fuentenan di energia aki pa resto di e curpa. Esaki alabes ta aumenta hamber y reduci metabolismo, loke ta conduci na aumento di peso den tempo.

Dietistanan hopi biaha ta cita e modelo carbohidrato-insulina pa splica e exito di dietanan halto den vet y abao den carbohidrato, manera e dieta ketogenico.

A diferencia di carbohidrato, vet dietetico no ta causa un aumento den nivel di insulina directamente despues di come.

Den otro banda di e debate, e modelo di balans di energia ta haci menos distincion entre vet y carbohidrato. E modelo aki ta enfoca riba e balans entre consumo total di caloria mediante alimento y bebida, y gasto total di caloria mediante actividad fisico. Segun e modelo aki, si consumo ta excede gasto, e resultado lo ta aumento di peso durante tempo. Pero si e gasto ta mas cu e consumo, e resultado eventual lo ta baha peso.

Demasiado simplistico?
 Skirbiendo den e journal Science, dos cientifico ta argumenta cu e modelo carbohidrato-insulina ta demasiado simplistico. John Speakman, di Universidad di Aberdeen na Escocia, y Kevin Hall di Instituto Nacional di Diabetes y Malesa Digestivo y di Riñon na Bethesda, no ta disputa e exito di dietanan halto den vet y abao den carbohidrato pa cierto individuo.

Tambe nan ta reconoce cu insulina tin un rol importante den regulacion di vet den curpa.

Pero nan ta cuestiona si e efecto di insulina riba adipocytes despues di come cuminda halto den carbohidrato ta exclusivamente responsabel pa aumento di peso. Nan ta skirbi: “Nos ta propone cu por compronde miho e rol di insulina den obesidad door di considera su accion riba varios organo cu ta impulsa pa factornan principalmente independiente di consumo di carbohidrato. Reconsiderando e rol di insulina por mehora nos comprension di e causanan di obesidad y su tratamento.”

Nan a cita un estudio di 2020 den raton, cu a compara e efecto di 29 dieta diferente riba cantidad di vet den curpa. Di esakinan, 16 dieta a mantene un consumo constante di proteina mientras a varia e contribucion relativo di vet y carbohidrato cu e consumo total di caloria.

E modelo carbohidrato-insulina ta pronostica cu mas carbohidrato tin den un dieta, mas halto e nivel di insulina lo aumenta despues di come. Como resultado, segun e modelo, e raton lo mester acumula mas vet y aumenta nan consumo total di caloria.

Sinembargo, despues di 12 siman – alrededor di ekivalente di 9 aña den humano – raton cu a come dietanan halto den carbohidrato a consumi menos caloria y a acumula menos vet y peso en general. Esaki a pesar di tin un nivel mayor di insulina circulando despues di come.

Estudio den humano
 Reconociendo cu estudionan den raton por no refleha loke ta pasa den humano, e autornan ta cita investigacion den hende cu a produci resultadonan similar.

Por ehemplo, otro estudio reciente a compara e efecto di dos dieta riba hende cu sobrepeso. Cada dieta a dura dos siman. Un a consisti di alrededor di 10% carbohidrato y 75% vet, mientras e otro a consisti di aproximadamente 75% carbohidrato di 10% vet. Participantenan tabata permiti pa come cuanto cu nan kier.

Manera e modelo carbohidrato-insulin ta pronostica, e dieta halto den carbohidrato a resulta den un aumento di nivel di insulina despues di come. Sinembargo, participantenan den e dieta di hopi carbohidrato a consumi menos caloria y a reporta cu nan a sinti mesun satisfecho despues di come compara cu esnan riba e dieta cu menos carbohidrato.

Solamente e dieta halto den carbohidrato a resulta den un perdida significante den vet di curpa.

Speakman y Hall ta argumenta cu insulina ta afecta cantidad di organo den curpa, y no solamente despues di come. Nan ta skirbi cu su rol den regulacion di vet den curpa ‘ta miho comprondi como parti di un red dinamico di factornan controlando y facilitando e efectonan di desbalans di energia’.

Por ehemplo, nan ta bisa cu nivelnan halto di insulina, combina cu señalnan di tehido vet, ta bisa e cerebro pa reduci consumo di energia ora e cantidad di vet den curpa ta aumenta riba un nivel critico.

Evidencia alternativo
 David Ludwig, profesor di nutricion na Scol di Salubridad Publico di Harvard na Boston, un proponente lider di e modelo carbohidrato-insulina, a cuestiona e investigacion cita den e articulo di Speakman y Hall.

El a bisa Medial News Today cu e estudio den raton tabatin ‘prehuicio fuerte’ pasobra e dietanan cu menos carbohidrato tabata contene cantidad grandi di vet satura. “Den roedor, vet satura ta causa inflamacion severo y disfuncion metabolico, loke ta evita un test significativo di e modelo”, el a bisa.

El a agrega cu otro estudionan a haya cu rodentenan riba dietanan halto den carbohidrato rapidamente ta desaroya obesidad.
Ademas el a reta e validez di estudionan relativamente cortico den humano, manera e estudio di dos siman cita pa Speakman y Hall, cu el a bisa no ta duna e curpa suficiente tempo pa adapta na e cambio den nutriente.

Su propio meta-analisis ta sugeri cu estudionan mas largo consistentemente ta mustra mas gasto di energia riba dietanan cu menos carbohidrato.

Varios revision di testnan clinico a mustra cu dietanan cu menos carbohidrato ta promove perdida di peso.

Profesor Naveed Satar di e Instituto di Ciencia Cardiovascular y Medico na Universidad di Glasgow na Escocia a bisa Medical News Today cu dietanan abao den carbohidrato por yuda hende baha peso. E ta kere cu exito di e dietanan ta e consumo total di caloria mas chikito a resultado di un apetito reduci, pero no di e forma con expertonan a imagina e modelo carbohidrato-insulina.

“Hende cu ta bay den dietanan cu menos carbohidrato ta come menos mientras nan ta aumenta consumi di proteina, cu ta suprimi apetito un tiki”, el a splica. El a agrega cu su propio investigacion ta sugeri cu e consumo excesivo di caloria den individuonan cu sobrepeso ta bin di vet y no di sucu.

Esaki ta sugeri cu ademas di reduci consumo di caloria, mester reduci consumo di vet como un componente importante den dieta pa baha peso.