“Ami no a wak ningun ley,” ta locual Vice-presidente di Conseho Electoral mr. Hubert Maduro a bisa. E ex Presidente di Conseho Electoral, ex-miembro di Raad van State pa Aruba, a bisa cu tanten cu no cambia ley, den su concepto mester sigui haci uso di e Kiesverordening existente cu ta duna instruccion hopi specifico con mester vota.

E posicion di Sr. Maduro ta diferente cu esun di Presidente di Conseho Electoral dr. Glenn Thode, den sentido cu segun e Presidente di Conseho Electoral locual mester introduci pa por permiti sosten electronico den votacion ta un ‘tijdelijke landsverordening.”

E punto ta cu e stembiljet mester bay den un buson, den e stembus. Y segun e sistema di scanner esey ta sosode tambe. Pero e problema segun mr. Hubert ta cu ta rekeri pa habri e stembiljet prome cu scan y haci esaki den presencia di tur den e urna electoral. Pasobra aki ley ta hopi cla. E stembiljet mester ta dobla y cera pa e por drenta e buson. “Mester adapta e ley.”

Na Merca, hopi di e stembiljetnan tabata bin cu post y nan tabata pega den e scanner. Na Aruba, ta un hende lo anda cu e biyete, pero “ami mes no ta mucho ‘handig,’ y mi tin un man cu ta un poco mancaron cu por dobla e biyete cu lo por pon’e pega den e scanner. Y esey por produci cierto tardanza.”

USB sticks

Den concepto di Maduro, mester tin un ley pa dirigi henter e proceso nobo, particularmente pa brinda claridad kico ta pasa cu e USB stick cu cada Presidente di e urnanan electoral ta saca afo di e scanner. Manera ta conoci, e scanner ta conta e bolita cora, ta benta e papel den e buson y automaticamente ta tabula e resultado. E resultado preliminario aki ta bay riba un USB stick cu despues ta hiba pa Urna Electoral principal, esta Hoofdstem Buro ( e papelnan lo keda conta despues y esey ta e conteo oficial).

“Ley ta bisa cu na fin di e ciclo di eleccion, na fin di e proceso mester destrui tur e stembiljetten. Nan no por keda pa ningun hende por keda coba den nan, pa evita cu hende ta bay busca despues, pa purba saca afo ken a vota pa ken.” Y esey ta algo cu mester conta tambe pa e USB sticks di eleccion 2021. “Mester destrui nan pa evita e impresion robes cu por conecta e momento di voto, hunto cu e momento di scanning. Ami no ta kere cu por saca afo ken a vota pa ken via e sistema aki.”

Pero Hubert Maduro ta admiti tambe cu e no a mira e proposicion di e tijdelijke landsverordening pa determina si e stipulacion aki ta den inclui of no.

Manera Bon Dia Aruba a mustra caba, expertonan di Constitucion a bisa cu pa cualkier cambio den e Kiesverordening, si kier haci’e na forma debido, e mester pasa prome pa Parlamento, sea ta un tijdelijke landsverordening of no. “Landsverordening ta keda un ley, y e mester keda aproba pa Parlamento,” ta locual a bisa Bon Dia Aruba.

Di otro banda, si tur 8 partido cu mester di e 587 firmanan logra acumula esakinan e siman aki, e ta nifica cu 12 partido lo participa na eleccion dia 25 di Juni venidero. Y si esey ta e caso, lo no por haci uso di e scanner. Pasobra e sistema ta traha pa maximalmente 11 partido. Aruba lo tin un di mas y mester e ora bay pa e sistema tradicional di conta na man despues, y deposita e voto cu e stembiljet cera.

Hubert Maduro ta recuperando di un operacion grandi y apenas ta na Aruba y no tabata mucho envolvi den e proceso, a pesar cu e ta Vice Presidente di Conseho Electoral. Otro miembronan ta nombra pa e partidonan politico.