(phocuswire) – Aruba, trahando cu SITA y Indicio.tech, a cuminsa test un app nobo pa permiti bishitantenan comparti nan estado di salud relaciona cu Covid-19 di forma priva y sigur riba nan aparato mobil. E meta ta pa permiti turistanan move di forma sigur riba e isla mientras ta preserva nan privacidad, elimina fraude y ta duna gobierno e habilidad di revoca acceso si tin cambio den e condicionnan.

E partnernan en cuestion a ehecuta e test piloto cu boluntarionan cu tabata bishitando e isla pa un torneo di poker siman pasa. E Aruba Health App ta usa tecnologia di blockchain pa crea un credencial digital unico pa cada bishitante.

Nos isla ta rekeri pa tur bishitante duna prueba di un PCR test negativo di Covid-19, tuma dentro di 72 ora prome cu bula bin e isla. Usando e app, laboratorionan di test por manda resultadonan directamente na e biahero riba su aparato mobil [red: celular, tablet], y e biahero por comparti e resultadonan aki a traves di e app cu Departamento di Salud di Aruba. Unabes e departamento ta verifica e resultado, e app ta duna un QR code cu personal di hotel, restaurant of otro sitionan por scan pa confirma resultado negativo prome cu ta permiti entrada na e establecimento.

E data ta keda den un cartera digital personal cu por wordo habri y comparti solamente pa e biahero. Blockchain ta ser usa pa comunica y verifica cu e credencial ta valido.

Director di SITA Lab, Gus Pina, a bisa cu e solucion ta sigur y facil pa biaheronan y tambe ta elimina e necesidad pa personal di hotel, restaurant y otro luganan cu turistanan ta bishita mester mira data di salud of interpreta e reglanan mas recien di Covid. “Personal di hospitalidad tabata incomodo manehando data priva, mirando documentonan medico”, el a bisa. “Y protocolnan ta cambiando asina lihe, den termino di kico ta valido of kico no ta valido. Pues e maneho cu nos a tuma ta pa separa e informacion medico di e concepto di confiansa. Nos kier a presenta pa personal di hospitalidad, mientras e biahero ta move riba e isla, si e ministerio di Salud ta confia e persona aki pa ta liber di Covid y cumpliendo cu protocol.”

Ministerio di Salud tambe por revoca e credencial di confiansa di e biahero instantaneamente riba e app, por ehempel si status di Covid di su pais ta mira cualkier cambio.

“Si tin un brote, si tin mutacion y bo tin mester di otro vacuna of un booster, e ora ey por revoca e confiansa en cuestion te ora remedia e situacion, e ora ey bo por haya bo credencial di biahero confia back”, Pina ta bisa.

Awo cu a completa e piloto, SITA ta spera di extende uso di e app na Aruba y na otro paisnan.

“E Aruba Health App ta fundamental den balansa e retonan dobel di reapertura di nos isla pa turismo mientras ta maneha e riesgo di Covid-19. Door di provee un credencial di biahero confiabel, nos por ta sigur cu bishitantenan tin e documentonan corecto cu ta necesario pa move libremente riba e isla, mientras ta haci e verificacion di e status confia aki facil sin mester revela informacion personal. Esey ta un stap dilanti revolucionario”, segun minister demisionario di Salud, Turismo y Deporte, Dangui Oduber.