(El Tiempo) – Continuando cu e agenda di dialogo den marco di e welga nacional, e presidente Ivan Duque ayera diadomingo a reuni cu lidernan di diferente religion, ken nan a expresa su apoyo pa sigui busca un salida na e crisis aki via di conversacionnan.

E encuentro a tuma luga na centro di Bogota, na Museo Nacional y ademas di Duque, e Gobierno a conta cu e participacion di e vice-presidente Marta Lucia Ramirez, den compania di minister di Interior, Daniel Palacios; alto comisionado di la paz, Miguel Ceballos; e consehero di DDHH, Nancy Patricia Gutierrez, vice-minister di Interior, Carlos Baena y Director di Dapre, Victor Muñoz.

Despues di e encuentro, e lidernan religioso a emiti un declaracion den cual nan ta indica cu nan ta pidi pa “lanta e blokeonan cu ta afecta miyones di famia Colombiano” y nan ta rechasa “cualkier abuso di parti di algun miembronan di e forsa publico, asina como nan ta encurasha y gradici e tarea cu a wordo haci pa garantisa e protestanan pacifico y siguridad di tur Colombiano” .

Den e declaracion di e lidernan religioso ta indica:

  1. E lidernan religioso di Colombia, manera nos a haci individualmente, for di distinto religion, creencia y denominacion, nos ta resa pa e pueblo Colombiano y su institucionnan.
  2. Nos ta haya cu den e dialogo y unidad ta e caminda pa supera e violencia. Nos ta pidi pa lanta e blokeo cu ta afecta miyones di famia Colombiano. Nos ta rechasa cualkier abuso di parti di algun miembronan di forsa publico, asina como nos ta encurasha y gradici e tarea cu a wordo haci pa garantisa e protestanan pacifico y siguridad di tur Colombiano.
  3. Nos ta expresa nos conviccion di mantene y fortalece e programanan social pa e personanan den condicion di vulnerabilidad y nos ta invita pa cu e gobierno sigui fortalece esey.
  4. Nos ta expresa nos respaldo na institucionalidad den e buskeda di adelanta procesonan di dialogo pa avansa na un solucion di e necesidadnan di esunnan mas pober, asina como su rechaso na cualkier forma di violencia, cu ta bin for di cualkier parti, y uso di via cu a afecta severamente e Colombianonan durante e ultimo siman.
  5. Nos ta apoya e ehercicio di scucha e otronan, e dialogo constante y habri cu e presidente di Republica a cuminsa cu e representantenan di distinto sector, tanto na nivel nacional como regional, pa construi di un manera conhunto solucionnan cu lo permiti atende e necesidadnan di e Colombianonan y nos ta rechasa cualkier invitacion na violencia, odio, discordia y destruccion di nos sociedad.