Raiz lo no mester tabata na Plaza Padu Lampe. Pero Ursell Arends, lider di Raiz a dicidi pa trece e lista personalmente apesar cu ya el a haci e entrega oficial virtualmente.
Segun Arends, ta partidonan tradicional no ta respeta democracia y asina a bin intimidacion. Kico e intimidacion tabata, Arends no kier a bisa. E mes no ta kere cu mester a entrega e lista personalmente pasobra den su concepto, el a haci esaki den forma virtual y cu esey lo a cumpli cu ley. Conseho Electoral a tuma e lista y esey lo mester tabata suficiente.
“Ley no ta papia cu mester ta presente fisicamente, sino cu mester haci’e personalmente. Ami a entrega e lista personalmente, den forma virtual. Nos a conecta pa 12:14 awe merdia cu Conseho Electoral y nos a haya e certificacion cu nos lista ta cumpli cu tur rekisito.” El a splica cu hendenan no ta compronde e ley. Pasobra aunke cu e ley a keda traha tempo cu no tabatin tecnologia, entrega virtual ta mescos cu si ta haci’e fisicamente.
Pero, den palabranan di Ursell Arends, e intimidacion cu el a experiencia henter dia a pone dicidi pa no laga candidatonan ni e comunidad den duda y como tal a dicidi pa trece e lista den forma fisico. “Raiz ta bay eleccion 2021. Si pueblo kier wak cambio, Raiz mester ta den Parlamento y Cocolishi.” Den su concepto e solo hecho cu partidonan tradicional a sinti e necesidad pa intimida Raiz ta mustra cu nan ta trata di asalta democracia di Aruba. “Abogadonan ta trahando pa asalta democracia. Spera cu pueblo mira esaki.”
Pa loke ta e lista, esaki ta uno innovativo. “Mi no ta kibra mi cabez. Locual mester pasa ta cu comunidad mester uni, y haci e cambio.”
