Awe den oranan di mainta, partidonan politico a cuminsa yega na Censo pa asina haci entrega di e lista di nan candidato cu lo participa den eleccionnan di dia 25 di juni, cumpliendo cu protocolnan di bio-seguridad y estableci pa Crisis Team Accion 21 ta e prome cu a yega cu e presencia di dos di su candidato.
Miguel Mansur, lider di partido Accion 21, a expresa cu esaki ta un momento increiblemente special pa su persona y specialmente pa e ekipo cu nan ta forma pa asina hunto por presenta nan mision y vision.
Di loke ta trata e cantidad di firma cu nan mester haya pa por participa como partido den eleccion, Mansur a sigura cu nan ta kere cu nan tin cla e 587 persona cu lo firma pa nan por cumpli cu esey den e prome dianan.
Na varios pais rond di mundo ta un custumber evalua e prome dianan di un gobierno ora ta yega na poder, di esaki Mansur a declara cu si nan lo yega di forma parti di coalicion, e prome cos cu nan lo bay haci ta publica tur data di gobierno, tur estudio pa hende sa con nan placa a wordo gasta.
Asina mes el a sigura cu e lo bay Hulanda tambe pa asina bay re-negocia e financiamento di e debe cu Aruba tin pa comunidad por haya un alivio y cuminsa ehecuta nan plan, ademas Mansur a trece dilanti cu tin hopi persona na Aruba cu por ta indocumenta y cu nan tambe kier traha riba esey pa e regularisacion di nan.
“Tin hopi cos pa haci den e prome 100 dia”, Mansur a comenta.
Di mesun forma, Mansur a splica cu e landspakket “ta un oportunidad cu a haya di un generacion pa tuma medidanan impopular, ta increibel y iresponsabel pa dos partido grandi ta birando ta halando atras y esey ta politica di engaño y populista pa nan bay gana eleccion y despues bin dal bo cu mas medida”, el a finalisa.
