(AP) – Hunta di supervision di Facebook, cu diaranson ultimo a sostene e prohibicion di ex-presidente Mericano, Donald Trump, tambe tabatin palabra fuerte pa e compania. Yamando e suspension indefinido di Donald Trump un ‘castigo vago sin standard’, e hunta a acusa Facebook – su sponsor corporativo – di busca pa ‘evadi responsabilidad’ door di pidi su grupo di supervision quasi-independiente pa resolve e asunto.
Pero criticonan no ta convenci cu decision di e hunta ta representa un triunfo pa independencia of responsabilidad. De hecho, hopi ta mira su enfoke estrecho riba asuntonan contencioso singular como un distraccion di problemanan mas profundo, manera e poder masivo di Facebook, su aligoritmonan misterioso cu por amplifica odio y desinformacion, y preguntanan mas serio y complica tocante regulacion gubernamental.
“Ta hopi mas facil pa papia tocante Donald Trump” cu tocante negoshi di Facebook, segun presidente di Color of Change, Rashad Robinson, y critico di Facebook. “Nan kier tene nos den e combersacion tocante e pida di contenido aki of aya, cu esaki ta tocante libertad di expresion na luga di ta tocante aligoritmonan amplificando cierto tipo di contenido, loke no tin nada di haci cu libertad di expresion.”
E hunta, Robinson a bisa, ta un ‘estafa pa evadi accion regulatorio’.
Yegando despues di varios luna di deliberacion y casi dies mil comentario publico riba e asunto, e decision di e hunta riba Trump a bisa Facebook pa specifica con largo e suspension di su cuenta lo dura, bisando cu un suspension ‘indefini’ riba Trump no ta rasonabel. E veredicto, cu ta duna Facebook seis luna pa cumpli, efectivamente ta pospone cualkier reinstalacion di Trump y ta pone e onus pa e decision aki back riba e compania.
“Nan a tuma e decision corecto”, segun Yael Eisenstat, un ex-agente di CIA cu a traha pa seis luna na 2018 como cabesante global di Facebook pa operacionnan di integridad di eleccion pa aviso politico, y awo ta un investigador na Betalab.
Pero e enfoke riba e proceso di hunta di supervision, el a bisa, ta duna Facebook exactamente loke e kier. “Nos ta dirigiendo nos tempo, atencion y energia leu di e discusion mas importante tocante con pa tene e compania responsabel pa nan propio herment, diseño y decisionnan di negoshi cu a yuda transmiti teorianan di conspiracion peligroso”, el a bisa.
Facebook a bisa cu a laga cla publicamente cu e hunta di supervision no ta un reemplaso pa regulacion.
“Nos a establece e Hunta di Supervision independiente pa aplica responsabilidad y escrutinio di nos accionnan”, e compania a bisa den un declaracion. “E ta e prome cuerpo di su tipo na mundo: un organisacion independiente lidera pa expertonan cu poder pa impone decisionnan obligatorio riba un compania priva di rednan social.”
Un fuente mayor di preocupacion entre criticonan di Facebook: E hunta di supervision a reporta cu e compania a nenga di duna contesta na preguntanan detaya tocante con su caracteristicanan tecnico y modelo di negoshi basa riba aviso tambe por amplifica extremismo. E grupo vigilante Public Citizen a bisa cu ta preocupante cu Facebook a nenga, por ehepel, di bisa con su news feed a afecta visibilidad di postnan di Trump.
“No tur hende ta mira loke cualkier individuo ta post, pues e aligoritmonan ta dicidi ken ta mir’e, con nan ta mir’e, ki ora nan ta mir’e, y Facebook probablemente tin tur sorto di informacion tocante e nivelnan di participacion”, Robert Weismann, presidente di e grupo, a bisa. “E compania ta debe nos tur un post mortem riba e forma con ta usa y opera Facebook – si el a amplifica loke Trump tabata bisando y contribui na e insureccion.”
Otro preocupacion: Con accionnan di Facebook ta resona den exterior. E hunta ta evalua si decisionnan di Facebook ta responsabel na normanan di derechonan humano internacional, como tambe e propio politicanan di e compania.
“E pregunta cu tur persona ta puntra ta si Facebook ta den un mercado lucrativo, y e ta confronta cu un lider politico cu ta incita violencia, Facebook lo scoge seguridad y derecho humano riba su bottom line?” Segun Chinmayi Arun, un fellow na Proyecto di Sociedad di Informacion di scol di ley di universidad di Yale. “Ta husto pa bisa cu un ex-presidente no ta e unico lider mundial considera como incitando violencia.”
Facebook a crea e panel di supervision pa goberna riba contenido contencioso despues di critica amplio riba su mal maneho di desinformacion, discurso di odio y campañanan di influencia nefasto riba su plataforma. E decision di Trump tabata e di dies decision di e hunta desde cu a cuminsa tuma casonan aña pasa. E prome nuebe decision di e corte usualmente a faborece expresion liber riba restriccion di contenido.
E compania ta paga pa e hunta mediante un ‘trust independiente’. Su 20 miembro, cu eventualmente lo crece na 40, ta inclui un ex-prome minister di Dinamarca, ex-hefe di edicion di corant The Guardian, como tambe academiconan legal, expertonan di derechonan humano, y periodistanan. E prome cuatro miembro di e hunta a ser scogi directamente pa Facebook. E cuatro ey a traha cu Facebook despues pa selecta miembronan adicional.
E criticonan mas prominente di Facebook – incluyendo investigadornan di desinformacion, academico- y activistanan – notablemente ta ausente di e hunta.
“Esaki ta hende hopi inteligente y capaz cu ta pone nan mes den e hunta aki”, Robinson a bisa. Pero, el a bisa, ‘e hunta di supervision ta un cantidad di consultant di Mark Zuckerberg. El a contrata nan, paga nan y por deshaci di nan si e kier’.
Vocero di e hunta, Dex Hunter-Torricke a urgi pa criticonan husga e hunta riba e decisionnan cu ta tuma.
“Esaki no ta un grupo di hende cu ta sinti un obligacion di bay suave cu e compania”, Hunter-Torricke a bisa, kende anteriormente tabata skirbi discurso pa CEO di Facebook, Mark Zuckerberg. Den decision diaranson, el a agrega cu ‘e hunta di manera hopi cla a bisa cu Facebook a kibra e reglanan como tambe Sr. Trump, y esey no ta apropia.”
