Website di CDC awo ta enfatisa cu coronavirus ta transmiti den aire

(CNN) – Centro Mericano pa Control y Prevencion di Malesa (CDC na Ingles) ayera a actualisa su splicacionnan riba transmision di coronavirus, insistiendo cu inhalacion ta un di e formanan principal cu ta transmiti e virus, y poniendo menos enfasis riba piki esaki riba algun superficie.

E cambionan riba website di CDC ta den linea cu un cambio gradual den conseho di e agencia pa insisti cu e virus ta transmiti via aire – sea pa wordo inhala ora ta hala rosea, drenta den wowo, of cay riba superficienan cu despues hende ta touch.

“Covid-19 ta transmiti ora un persona ta exhala druppel y particulanan hopi chikito cu ta contene e virus. E druppel y particulanan aki por ser inhala pa otro hende of cay riba nan nanishi, wowo, of boca. Den algun circunstancia nan por contamina superficienan cu nan ta touch. Hende cu ta mas cerca di 2m di e persona infecta tin mayor probabilidad di bira infecta”, e agencia ta bisa riba su actualisacion.

“Con hende ta contrae e virus por keda reduci na tres concepto hopi simpel”, Dr. John Brooks, hefe medico di respuesta di CDC na Covid-19, a bisa CNN. “Tene e aire limpi, evita ta expuesto den bo membrana mucoso, y tene bo man limpi.”

Mas comunmente hende ta infecta cu e virus mientras nan ta para cerca na un persona cu ta infecta, y particulanan ta bula y sea ta cay riba nan cara of ta wordo inhala, e splicacion nobo ta insisti. Menos comunmente, hende ta haya e virus door di respira aire contamina pa hende cu ta mas leu of door di touch un superficie contamina y despues touch nan propio wowo, nanishi of boca.

“Si ami y abo ta para dentro di un meter di otro papiando, nos sa awo cu particulanan infeccioso ta bulando, hasta si bo papia keto”, Brooks a bisa.

E splicacion nobo no ta cambia loke hende mester haci, pero por yuda publica compronde miho con e virus ta transmiti, Brooks a bisa. Guia ta keda mescos – bisti tapaboca cerca di otro hende of ora ta paden compartiendo aire cu otronan, tene distancia di otro ora ta posibel y laba man frecuentemente. Y tuma vacuna.

CDC tambe a actualisa su informacion cientifico riba con e virus ta transmiti.

“Modonan di transmision di SARS-Cov-2 awo ta caracterisa como inhalacion di virus, deposita virus riba membrana mucoso expuesto, y door di touch membrana mucoso cu man sushi contamina cu virus”, e guia nobo ta bisa. “E modo principal cu cual hende ta bira infecta cu SARS-CoV-2 ta mediante ta expuesto na likido respiratorio cu ta carga e virus infeccioso”, ta agrega.

CDC a agrega na su informacion cientifico riba uso di tapaboca pa combati miedo tocante e seguridad di bisti tapaboca. “Investigacion ta reporta cu bisti tapaboca no tin efecto adverso significante riba salud di esun cu bistie”, a bisa.

Mask no ta djis filtra aire, Brooks a destaca. “Bisti tapaboca ta cubri bo membrana mucoso. Ta mas dificil pa touch bo boca ora tin un tapaboca riba dje”, el a nota.

Cientificonan cu tabata na fabor di e hechonan a expresa tanto elogio como critica.

“Mi ta hopi contento cu cantidad di esaki. Mi ta kere ta un stap importante y mayor bay dilanti”, segun Dr. Donald Milton, kende ta studia e forma con virus ta transmiti, na Universidad di Maryland.

Pero Milton a firma un carta hunto cu seis otro experto riba aerosol pa bisa cu CDC mester haci mas. “Sinembargo, nos ta preocupa cu e documento adicional di CDC, ‘Con Covid-19 ta Plama’, ta engañoso y potencialmente dañino”, nan a skirbi.

“Den e documento en cuestion CDC ta bisa cu inhala druppelnan chikito y particula (i.e. aerosol) cu ta contene e virus ora hende ta leu di otro of ta den e mesun espacio cerca pa mas cu algun minuut ta INUSUAL (nos enfasis). Esaki lo conduci na hende cu ta continua kere cu tene distancia ta suficiente pa preveni transmision.”

E no ta suficiente, nan ta bisa.

“Nos sa cu transmision na distancianan mas grandi cu 2 meter ta tuma luga, pa motibo di eventonan ‘superspreader’, estudionan cuidadoso di brotenan mas chikito, y e fisica di aerosol. E por pasa facilmente paden den un ambiente mal ventila, sea hende ta bisti tapaboca of no.”

Nan kier pa CDC pusha pa miho ventilacion den luganan manera facilidadnan unda ta paketa carni, unda ta recircula aire, y pa enfatisa e importancia di tapaboca conoci como respirator, incluyendo N95, den luganan unda hende ta forsa pa respira aire recicla.

“Si bo ta trahando den un planta di paketa carni unda nan ta recircula aire pasobra nan mester tene esaki friu, y bo ta para cerca di otro hende, bo mester di e respirator miho ey pa protege bo”, Milton a bisa.

Facilidadnan unda ta procesa carni y galiña tabata sitio pa varios evento di ‘superspreading’ di Covid-19 y trahadonan den e industrianan aki ta specialmente probabel di bira infecta.

“Nan ta djis pone shield di Plexiglass, cu por hacie pio”, Milton a keha. E y otro expertonan di aerosol a bisa cu shield di plastic por yuda concentra aire potencialmente infecta y ta haci tiki pa protege hende di e virus, otro cu stop druppelnan mas grandi cu ta sali di tosamento, nister y papia.

“Mi no ta den desacuerdo”, Brooks a bisa como contesta. “Esaki no ta guia nobo. Esaki ta comienso di con, talbes, guia lo cuminsa evoluciona”, el a agrega. “Ami lo keda pendiente. Esaki ta un asunto pa cual nos ta preocupa.”