Ignorando pregunta di algun medio di comunicacion presente, Partido RED Democratico a entrega nan lista di candidato na Censo

“E pais aki ta a wordo asota cu tur sorto di corupcion, Aruba ta yen di partido nobo y tin hopi hende cu tin deseo di trece un cambio, habri boso wowo y realisa cuanto oportunista tin cu ta bay di partido pa partido, ya nan idealnan no tin nada di haber cu e pais aki”.

Esaki tabata e palabranan cu e lider di partido RED Democratico Ricardo Croes a trece dilanti ora nan a yega na Censo pa haci entrega di nan lista di candidatonan cu lo participa den eleccionnan di 25 di juni.

Den su discurso el a cuestiona candidatonan cu segun e ta pretende cu nan tin e pais na pecho y ta pretende cu nan ta esun cu tin e solucionnan, Croes tabata forma parti di e coalicion di gobierno cu awor ta demisionario.

Asina mes, el a indica cu nan tabata prepara caba pa e trampa dia cu prome minister Evelyn Wever-Croes a bisa cu gobierno ta bay cas, pa motibo di posibel malversacion di fondonan, “si e prome minister aki kier a papia di integridad na serio, e gobierno aki no a yega leu pa e simpel hecho cu su mesun otro partner tabata bao investigacion di cosnan cu a pasa den su gobernacion”, Croes a sigura.

Asina mes, el a enfatisa cu Armando Rudy Lampe minister di Educacion Ciencia y Desaroyo Sostenibel di e gobierno demisionario aki a representa nan dignamente “como minister di Educacion el a yega di sufri un boycott politico”, el a declara.

Asina mes a cuestiona medionan di comunicacion pa loke a bisa cu “bosonan tur a cay den periodismo mediocre” el a referi na un otro medio di comunicacion cu segun el a menciona nan ta manipula y cu abiertamente nan ta bisa cua ta nan partido faborito y abiertamente tambe nan a bisa cu nan kier caba cu Ricardo Croes, segun loke el a vocifera.

Den un declaracion subi di tono, Croes a menciona cu medionan di comunicacion tin e deber di informa e berdad, banda di esey el a expresa cu nan a forma nan lista na ora y na tempo cu hendenan integro cu a subi riba lista di partido RED Democratico pa su idealnan y pa su visionnan.

“Si boso nan de facto kier un cambio den e pais aki, anto e ora bo tin cu vota consciente, sabi y di berdad”, Croes a enfatisa.

Ignorando preguntanan di algun reportero, incluyendo di reportero di Bon Dia Aruba Croes a bisa cu e pueblo tin e opcion di diferente partido pa por vota pa nan.