Gilbert Webb di HTC ta convenci cu comunidad lo reconoce e balor di HTC pa representa nan. Asina e lider di e partido di hobennan a bisa despues di a entrega su lista na Conseho Electoral. “Pa varios tempo caba, HTC ta campaña constantemente. Y e reaccion ta positivo. Pueblo kier cambio.”
E partido tin apenas 6 candidato, esta Michelangelo Celestijn, Latoya Briggs, Jessica Wernet, Albertico de Cuba y Roberto Tromp, ademas di Webb, pero esey no mester mira esey como un obstaculo. “Nos ta e unico partido cu ta humilde, cu ta scucha pueblo y si nos haya oportunidad, nos ta bay caba cu corupcion. Nos kier bin cu innovacion y crea pilarnan nobo. Nos a cu hopi hende ta sufriendo,” Webb a enfatisa.
Y e forma con ta bay logra esaki ta cu ayudo di expertonan cu ta asesora e partido, segun HTC. “Ta nos so mester di hende experto? HTC no ta riba su mes. Nos tin un conseheronan, coordinadornan cu ta asisti nos pa yega na un miho relacion cu Hulanda.”
Sinembargo HTC tin algun vision cla, esta pa baha salario di Minister y haci esaki permanente, mescos ta e cortamento den beneficionan. “Nos ta percura pa cumpli cu tur esaki. Nos lo percura pa saca tur contract y percura pa transparencia.”
Gilbert Webb ta consciente cu hopi hende ta haci mofa di e partido y e no ta molesti’e. “Mi mensahe ta, puntra unda bo ta awor. Nos mester mira e realidad. Tur partido ta haya sla pero nos ta kere cu nos ta haciendo bon. Nos ta para pa progreso.”
Gilbert Webb a pidi comunidad pa sostene e lista cu ta para pa positivismo y disponibilidad pa yuda.
