(LaPatilla) – Venezuela a enfrenta durante e promer trimester di 2021 un escasez di diesel cu e no a sufri den e mesun periodo aña pasa y cu a afecta significativamente operacion di e sectornan productivo di e pais.
E crisis di actividad petrolero nacional y e efectonan di e pandemia a provoca cu economia Venezolano a contrae cu 33,7% durante e promer trimester di 2021 compara cu e mesun periodo di e aña anterior, di acuerdo cu un calculacion realiza pa Observatorio Venezolano de Finanzas (OVF) en vista di e ausencia di dato oficial di parti di Banco Central.
E diputado di e Asamblea Nacional (AN) legitimo elegi na 2015 y economista Jose Guerra a señala den rueda di prensa, cu e principal factornan cu a provoca cu Venezuela a registra atrobe un recesion di su economia ta actividad petrolero nacional, cu tambe ta afecta e sectornan asocia manera transporte, servicio y construccion, y e efectonan di e pandemia di Covid-19 y di e medidanan implementa pa gobierno di Nicolas Maduro, cu a paraliza economia y a dificulta mobilidad di e ciudadano.
Desde cu Nicolas Maduro a yega na poder na 2013, Venezuela a registra un profundo recesion economico cu a traduci den un reduccion importante di e aparato productivo nacional, un aumento di desempleo y di pobreza y den un diaspora di mas di cinco miyon di Venezolano, un di e movimentonan migrante mas grandi di historia di e region. Entre 2013 y 2020, actividad economico a keda reduci cu 83%, segun OVF. E caida di produccion a significa tambe un escasez di bienes cu relacion na e moneda nacional, loke a conduci na e hiperinflacion historico cu a destrui e poder di compra.
