(AP) — Ganashi di Nintendo Co. pa e aña fiscal cu a termina na maart a aumenta 86% riba benta saludabel di su mashin Switch, mientras hende a keda cas pa motibo di e pandemia, usando wega di Nintendo como entretenimento.
Ganashi anual pa e fabricante Hapones di weganan di Super Mario y Pokemon a genera un record di 480.4 biyon yen ($4.4 biyon), un aumento riba d 258.6 biyon yen e aña anterior. E resultadonan, publica diahuebs, tabata miho cu e pronostico interno di ganashi di e compania, di 400 biyon yen ($3.7 bion).
Benta a aumenta 35% na 1.76 trillon yen ($16 biyon), e compania a bisa.
Den benta di software di wega, demanda a keda halto pa ‘Animal Crossing: New Horizons’, cu 20.85 miyon unidad bendi pa benta cumulativo di 32.6 miyon unidad. ‘Mario Kart 8 Deluxe’ y ‘Ring Fit Adventure’ tambe tabata popular.
Nintendo, basa na Kyoto, a bisa cu download digital pa e Switch tambe a bay bon, yudando sostene nan bottom line.
Pero Nintendo a bisa cu no ta spera un bon suerte asina pa persisti durante e aña fiscal actual, cu ta termina na maart 2022. Ta pronosticando un reduccion di 29% den ganashi na 340 biyon yen ($3 biyon).
Nintendo a bisa cu ta trahando riba weganan atractivo, incluyendo un colaboracion den sector mobil cu Niantic riba un app di Pikmin pa aparatonan smart. Ta spera di lansa esaki den segundo mita di 2021.
Otro titulonan di software planea pa lansamento global e aña aki ta inclui ‘Mario Golf: Super Rush’ y ‘The Legend of Zelda: Skyward Sword HD’. Un wega di Pokemon nobo ta planea pa fin di 2021, segun Nintendo.
Nintendo ta entre companianan cu a prospera durante e pandemia, cu tin impacto fuerte riba economia en general.
Su parke di atraccion Super Nintendo World na Osaka, Hapon, construi cu Universal Studios, a habri na maart despues di retraso pa motibo di e pandemia.
Pero a cera tiki despues pasobra Osaka ta un di varios area den estado di emergencia pa motibo di un aumento recien di casonan nobo di coronavirus. E estado di emergencia a cuminsa luna pasa, y sigur lo wordo extendi despues di su fecha programa pa caduca dia 11 di mei, mientras ta pidi tur facilidad di gran escala pa keda cera.
