Hospital orguyoso di e tremendo sosten y profesionalismo di tur personal; Ultimo pashent di Corsou rumbo back pa su isla

Awe mainta Dr. Horacio E. Oduber Hospital a tuma despedida di e ultimo pashent di Corsou. Un momento sumamente alegre pa Hospital y mas ainda pe team di profesionalnan di HOH cu a traha incansablemente pa brinda cuido tur dia y den e caso aki a habri brasa pa pashent di Corsou y Boneiro na comienso di april 2021.

Riba 3 di april e prome pashentnan di Corsou y Boneiro a drenta HOH. Team di profesionalnan di HOH a brinda cuido na un total di 9 pashent covid-19 di Corsou y 2 pashent di Boneiro di cual tur a ser admiti riba cuido intensivo. Edad promedio di e pashentnan interna di Corsou y Boneiro tabata 56 aña, di cual e pashent mas jong tabatin 44 aña y e pashent di mas grandi 75 aña. Tur e admisionnan aki tabata den transcurso di 1 siman, pues por imagina e impacto grandi cu e tabatin riba e profesionalnan den cuido na HOH.

“Ora cu e pregunta a drenta pa ta solidario cu nos islanan ruman nos no a duda pa habri brasa pa nan, aunke Hospital di Aruba mes tabata yenando e momento ey cu mas pashent, asina Dr. Benjamin Croes, intensivista na HOH a conta.

Dia 1 di April Hospital di Aruba a anuncia cu den cuadro di solidaridad y humanidad ta saca un man pa nos islanan ruman Corsou y Boneiro cu ta pasando den momentonan sumamente dificil. Na e momentonan ey HOH a escala, habri mas cama pa pashent di Covid-19 cu consecuencia cu algun operacion electivo mester a wordo cancela.

Awe, 6 di mei, Hospital orguyosamente por bisa cu tur operacion electivo a start back y ta brindando tur e cuido necesario na nos pashentnan cu ta nos prioridad.

Hospital di Aruba kier a gradici Corsou y Boneiro pa e confiansa y tremendo colaboracion den e momentonan dificil cu nos ta pasando aden. “Ta un honor cu HOH por a extende un man y demostra hermandad den momentonan di incertidumbre y ta spera cu esaki ta comienso di mas colaboracion entre e islanan”, asina drs. Jacco Vroegop di Hunta di Directiva a duna di conoce.

Na e personal di Hospital cu un bes mas a demostra cu nan ta un team di profesionalnan capacita yena di solidaridad y hermandad un danki di curason pa tur loke boso ta haci pa pashent. Aruba un bes mas a demostra di ta grandi!