Den cuadro di protestanan y e ola di violencia cu Colombia ta pasando aden na e momentonan aki, tambe ta bin dilanti e noticianan cu no ta berdad (‘Fake News’) y un ehemplo di esaki ta un video riba Facebook cu a hala atencion internacional.
E video ta pertenece na e pagina ‘El Phineas’ unda por a mira un declaracion di e presidente di Colombia Ivan Duque, den cual e ta anuncia su renuncia como presidente di Colombia; por a mira cu e video a wordo edita y cu e ta un declaracion no veridico.
Ivan Duque ta un presidente hopi cuestiona na e momentonan aki pa via di un reforma tributario cu el a presenta y cu despues el a revoca pa via di tur e protesta y manifestacionnan cu ta tumando lugar na Colombia.
Ta importante pa trece dilanti cu e tipo di noticia y video aki ta hopi comun riba rednan social, sigur ora ta trata di tema asina delicado manera e protestanan na Colombia, unda cu te ayera a reporta 24 morto, basta persona herida y otronan cu a desaparece.
Un bon manera pa controla si un noticia riba rednan social ta berdadero ta controla riba website di medionan internacional grandi. Si ningun ta carga e mesun noticia anto por supone cu ta trata di fake news.
