Diamars un biaha mas KLM a yega Aruba cu un cargamento di vacuna marca Pfizer. Gobierno a haya cooperacion di Hulanda no solamente pa haya e vacuna Pfizer, cu ta un di e mihonan na mundo, pero tambe a haya mas dosis pa logra vacuna mas tanto hende possible.
Riba e vuelo di diamars a atardi a yega un poco mas cu 35 mil vacuna, cu ta un cantidad basta grandi, cual un poco mas cu 15 mil persona lo por wordo vacuna.
Aworaki tin en total 78.390 dosis di vacuna duna di cual 23.492 persona a haya ambos dosis. Tin otro 31.406 persona un dosis so y lo mester haya e di dos den e dianan aki.
Aworaki DVG a habri e posibilidad cu personanan di 18 aña bay ariba por walk-in y haya nan vacuna. Esaki ta un grupo grandi cu falta ainda.
Awe por a compronde for di Sharin Koolman, cu nan ta calcula cu pa fecha di eleccion lo tin un 60% di e poblacion vacuna. Pues no a logra yega e immunidad colectivo di 85% cu lo permiti gobierno tam as flexible, a pesar cu cada persona lo mester sigui mantene na e medidanan di proteccion.
E cantidad di personanan vacuna na Aruba ta basta halto, compara internacionalmente. Solamente Israel tin un poco mas cu 60% di su poblacion vacuna. Aruba ta den un posicion hopi positivo pa cu su economia cu e cantidad di vacunanan suministra. E ta mustra cu Aruba cu por cuminsa ricibi un volume mas grandi di turista, indicando cu Aruba ta un luga basta sigur pa bishita.
Mas apertura di e economia, lo trece mas circulacion di placa cu lo mehora e posicion financiero di Aruba, pero tambe pa e cuponan di trabou.
Manera a splica, e vacuna contra COVID-19 ta haci e chensnan cu un persona por contagia cu COVID-19 ta menos y si hay’e mes, e lo no ta asina pisa. Na e momentonan aki tin 139 caso activo y e cantidad di fayecidonan ta 100.
Mientrastanto, na Merca, ta evaluando vacuna (uno special) pa hobennan di entre 12 pa 15 aña. Den un par di luna lo por tin un decision riba esaki.
