Cada tanto tempo nos ta pasa den sucedido cu ta laga nos den shock, principalmente pa e manera con e sucedido tuma lugar. Den caso di suicidio e aspecto di sensacion ta hunga un papel importante pa determina si e fayecimento di un persona den e situacion ey ta haya hopi atencion publicitario. Como medio di comunicacion nos no ta participa den e tipo di reportahe ey, pero no ta duna comentario tampoco riba esnan cu ta haci esaki. Cada ken dicidi pa nan mes kico ta e normanan cu nan ta aplica den nan trabao periodistico.

Mas importante ta parce nos profundiza den e trasfondo di e fenomeno aki, cu no na tur momento ta mes frecuente den un sociedad, pues e tin algun relacion cu e situacion di e momento ey den e sociedad particular ey. E crisis economico causa pa Covid-19 a haci cu tin un poblacion mundial hopi mas bao presion con pa reinventa nan bida. Esey riba su mes caba ta ocasiona un ambiente den cual tin hende cu no ta mira un salida mas y ta scoge pa e decision total y ireversible aki. Pero, mientras cu e crisis actual por ta causa di un aumento di e fenomeno aki, e tabat’ey caba y lo t’ey despues tambe. Esaki ta haci cu ta necesario busca mas leu kico ta haci hende den un cierto ambiente social mas vulnerable. Pa haci esey nos mester bolbe na pasado, pa por splica kico por ta posible factornan cu ta hunga un papel den e desaroyonan den nos comunidad cu ta hiba nos na un situacion mas peligroso, specialmente pa nos hobennan.

Mescos cu otro sociedadnan, nos tambe a sinti e influencia di un comunidad cada vez mas individualiza, unda e lazonan familiar a bira mas los, y nos ta mira bida hopi mas den e perspectiva di kico nos ta haci cu nos propio bida na promer lugar. Un enfasis pisa riba actuacion di e individuo, y menos enfasis riba e ambiente social cu mester ta capaz di brinda e apoyo y proteccion cu nos tur mester, un mas cu otro. Esey tin un relacion directo cu e cambionan grandi cu a tuma lugar den nos comunidad den ultimo decadanan, unda te awe ainda tin cambio tumando lugar den e composicion di e poblacion, loke ta haci cu mas y mas e lazonan antiguo cu tabata forma e tejido di e comunidad, no t’ey mas. Nos ta topa regularmente cu discusion tocante e Aruba di antaño, unda e lazonan familiar tabata hopi mas estrecho, y e control social tambe tabata mas presente y no tabata limita na famia, sino tabata extende na nivel di bario tambe.

E situacion ey a cambia drasticamente; nos tin un poblacion mas grandi, mas mezcla y mas distante di otro. Ya nos no ta cana ta cuminda tur hende mas cu nos topa riba caya, aunke hopi tin e magnifico custumber ey ainda. Sin embargo, ta importante pa nos reconoce cu e Aruba ey no ta bolbe mas. Esey no mester haci cu nos ta bay sinta lamenta, mas bien ta importante pa nos cuminza pensa riba kico nos por haci pa nos haya un comunidad cu ta mas incluyente, ta duna nos mas un ‘sense of belonging’. Sin esaki ta dificil pa por brinda specialmente nos hobennan, pero tambe persona di mas edad, mas posibilidad pa mira un perspectiva pa nan mes den nan bida individual.Nos mester crea un comunidad nobo, cu ta brinda su hendenan e oportunidad pa haya nan lugar cu nan ta ambiciona a base di talento, conocimento y deseo individual. Pa cuminza nos mester puntra nos mes si actualmente nos comunidad ta bon equipa pa ofrece tur esey. Nos ta kere cu no. Mescos cu den hopi otro pais, nos sistema no ta asina incluyente, al contrario ta stimula limitacion di desaroyo na edad hoben, pa despues nos keda sorprendi cu nos tin un hubentud cu ta ‘going nowhere’. Esaki ta conta na promer lugar pa nos enseñanza, cu no ta funciona como e lugar di educacion cu e mester ta. Un scol no ta un tienda unda bo ta bay busca cierto articulo o mercancia, sino cu e ta extension di educacion familiar, cu hustamente mester atende e problemanan cu hopi famia tin pa brinda nan yiunan e lugar sigur cu nan mester. Nos mester cuminza admiti cu nos tin un enseñanza cu ta hopi deficiente y cu ta afectando futuro di nos hubentud. Esaki no solamente den sentido academico, cu un hoben no ta yega asina leu cu e por a yega cu un mihor base. E ta tambe e desaroyo y formacion mas integral di un persona cu ta requeri pa hopi aña caba e scol extendi den atardi, hustamente pa atende e problema di tanto mayor, muher o homber, cu tin un of mas trabao pa haci.

Y, cu esey anto nos ta bay logra? Tin mas tereno cu nos no a toca ainda, pero e ta un lugar prioritario pa cuminza. Mester haci un esfuerzo pa ofrece nos hobennan un ambiente unda nan por desaroya nan mes, unda nan por haya e ‘sense of belonging’ ey cu ta un necesidad pa cada persona. Nos no por preveni depresion completamente, pero si limita e factornan causante.