Rijbewijs ta valido si/no…Y ta ken por yuda…?

Parce cu e eleccion aki ta bay acompaña pa un serie di suceso confusivo, na beneficio di ken tur esaki no ta completamente cla ainda. Despues di e confusion causa pa falta di claridad den e asunto di cambio den e rutina di votacion dia 25 di juni proximo, pa cual ainda ta pendiente un splicacion di parti di presidente di Conseho Electoral na Staten, awor a habri e siguiente capitulo cu ta e confusion tocante e rijbewijs otorga durante un cierto tempo na e oficina na Santa Cruz. Tabatin problema cu esaki, den e sentido cu e oficina di Rijbewijs no tabata conecta cu e database di Censo, pa garantiza copia corecto di dato personal, manera por ehemplo nomber corecto.

Si nos memoria no ta faya nos, na 2017 tambe tabatin un discusion tocante e tema aki. E tempo ey, Bon Dia Aruba a publica riba e asunto, despues di un entrevista cu mr. Hubert Maduro di Conseho Electoral. Den esey tabata splica cu tabatin como 10.000 votador cu lo tabatin mester di un otro documento di identificacion valido, sea pasaporte o cedula di identidad, pa por vota den eleccion. Trasfondo di tur esaki tabata cu un investigacion den Censo a duna di conoce cu di e alrededor di 71.000 potencial votador, mas di 60.000 lo tabatin un pasaporte o cedula valido. Es decir, nan no tabatin problema pa identifica nan mes na urna, a base di e otro documento valido. E problema tabata den e rijbewijs cu a cuminza distribui na 2015, cu no por a usa como identificacion valido, pasobra tabatin eror y discrepancia cu e datonan personal manera nan tabata registra na Censo. A haci un investigacion riba e rijbewijsnanemiti entre juni y november 2016 y a bin topa cu mas di 1.500 rijbewijs cu eror ariba. Den e casonan ey tabata conseha pa (laga) cambia e rijbewijs.

Nos ta 4 aña mas leu y e problema di 2017 aparentemente no a keda resolvi, no completamente en todo caso. A bolbe na uso di e database di Censo pa emision di rijbewijs, loke a elimina e problema di eror den nomber y otro dato riba e rijbewijs cu tabata tuma lugar durante un cierto periodo. Pero aparentemente tin hopi ciudadano cu a keda cu e rijbewijs di e tempo ey, cu of sin eror den e datonan. Awor nos ta dilanti otro eleccion, cu pa colmo a bin tres luna adelanta, y e periodo pa bay saca un rijbewijs nobo a bira hopi cortico. Ademas, e ciudadano cu tin un rijbewijs cu eror ariba, si nos a comprende bon, lo mester carga e gasto di e documento nobo cu gobierno di Aruba lo dun’e. Aki tin un otro confusion cu nos no ta comprende: si gobierno di Aruba ta duna bo un documento cu no ta sirbi, y pa cual pa paga bon placa, abo mester carga cu e gasto di un rijbewijs nobo? Of no mester ta asina cu, fuera di un rijbewijs nobo, un disculpa bon sincero lo no ta mas cu na su lugar? No ta bay pa e hecho cu e tempo ey tabatin otro mandatario di husticia cu no kier a tende y a permiti e trabao menos cu mediocre ey sucede; gobernacion ta continuacion y na 2021 no ta spera di ningun funcionario publico pa, cu un sonrisa cinico, referi e ciudadano na e proceso di busca un rijbewijs nobo, pa e ciudadano haya paga. Asina leu cu nos por averigua, no tabatin adaptacion mas despues di 2011 di e Landsbesluit rij- en keuringsbewijzen cu por a cambia status di e rijbewijsnan duna den e periodo problematico aki.

Kico tur esaki ta significa? Cu un parti di e grupo, cu rijbewijs no adecua pa presenta como identificacion na urna electoral, mientras tanto sea a haya un rijbewijs valido, o a saca pasaporte o cedula, di manera cu a pesar di un rijbewijs deficiente nan por vota en todo caso.

E otro parti, cu ainda tin como unico forma di identificacion un rijbewijs deficiente, y cu ta desea di tin un documento valido – pa no usa e palabra ‘drechi’ – lo mester por haya esaki, di forma diligente y sin gasto pa e persona. Al fin y al cabo, ta gobernacion a comete pifia, y ta gobernacion mester remedia. Y como cu e gobierno anterior no t’ey mas, ta esun cu t’ey mester actua. Y esey ta implica mas cu simplemente declara cu ta e rijbewijsnan emiti – di e forma corecto via Censo – so ta valido. Nos por comprende cu esaki formalmente lo ta corecto, sin embargo gobierno tin un tarea mas amplio di informa e ciudadano, pasobra e no ta problema di e ciudadano so, y tambe indica con ta soluciona e asunto aki. Nos no por keda pega den simplemente tira culpa riba e mandatario anterior cu a haci mal trabao, loke ta un hecho cu te awe e ex-mandatario ey no ta acepta, pero nos mester sigui move. Si no, nos ta keda lamentablemente pega den e situacion, unda gobernacion no ta mira como su tarea pa resolve problema. O, peor ainda, cuidao e observacion cinico di un ciudadano no bira realidad: “un funcionario publico ta un persona cu pa cada solucion… sa un problema…