Tin hopi tempo caba ta bisa cu e rijbewijs cu a otorga na Warda di Polis na Santa Cruz no ta completo. Y e datonan no ta corecto. Y ta p’esey no por uza e rijbewijs otorga na Santa Cruz como prueba di identificacion. Asina Sharine Luidens, Director di Registro Civil y Censo a bisa Bon Dia Aruba.
A acerca mr. Luidens basa riba e declaracion di Prome Minister Evelyn Wever Croes cu unicamente por uza e rijbewijs cu Censo ta otorga. “E rijbewijs cu Censo ta saca tin e datonan personal corecto,” Luidens a bisa. “E no ta culpa di Cuerpo Policial di Aruba cu e rijbewijs imprimi na Santa Cruz tabatin fout cu datonan personal.”
Pero Polis ta keda acepta e rijbewijs en cuestion, pues esun imprimi na Santa Cruz como un documento oficial pa trafico. “E no ta un identificacion oficial, sino uno pa por core auto,” Luidens a clarifica.
Den e sentido ey, carchi di identificacion of paspoort ta considera e pruebanan di identificacion legal, ya cu Censo ta percura pa nan, mescos cu e rijbewijs nobo, ya cu ta uza e datonan personal corecto cu ta cuadra cu e registro di electorado (kiezersregister).
Ley eleccion
Di otro banda Kiesverordening di Aruba, esta ley di eleccion, specificamente articulo 59 ta bisa cu por uza rijbewijs como prueba di legitimacion ora di bay vota. E articulo ta referi na articulo 10, inciso 2 di e Ley di Trafico. Riba e pregunta si ta bay cambia e ley, Luidens a bisa cu Presidente di Conseho Electoral dr. Glenn Thode lo splica e detayenan.
Riba e pregunta si Censo lo tin facilidad pa personanan por busca nan rijbewijs nobo, a pesar cu nan tin un rijbewijs valido (imprimi na Warda di Polis na Santa Cruz), e Director di Registro Civil y Censo a enfatisa cu e responsabilidad pa un persona tin un prueba di identificacion legitimo ta keda na e individuo.
Te cu ciere di nos edicion no a ricibi contesta di Dr. Thode riba e pregunta si ta bay adapta ley pa asina exclui uzo di e rijbewijs cu no ta otorga na Censo como prueba di identificacion.
