(Today.com) – Di tur caminda unda melanoma por ta riba curpa, cancer di cuero di Alexander Gupman a aparece riba su horea.

E tabata consciente di e ‘spot’ pa varios aña – un crecemento manera un mole, un purunchi, riba e cartilago di su horea banda links cerca di e canal – pero esaki no tabata parce di cambia, pues dokternan no tabata preocupa.

Pero na herfst 2020, e prome aña cu e no a haci su chekeo di cuero anual pa motibo di crisis di coronavirus, un amigo di 7 aña di edad di su yiu muhe a mir’e y a bisa ‘bo horea ta mustra straño’.

Mirando di nobo su horea, el a ripara cu e spot a crece mas grandi, y na dado momento a cuminsa sangra. El a manda un potret di esaki na su dermatologo na januari y inmediatamente a programa un biopsia. E diagnostico: melanoma etapa 3.

Pa elimina e forma di cancer di cuero mas mortal, dokternan a elimina e spot hunto cu parti di su horea y algun lymph node cu tabata infecta.

Pa un luna, Gupman a cana rond cu ‘un buraco tamaño di un diesplaca riba mi horea’ prome cu a reconstrui esaki usando cuero di su pia. El a referi na e resultadonan como ‘absolutamente asombroso’. Pero a corta un nervio durante cirugia y el a perde sinti den banda links di su cara.

Gupman, un empleado di gobierno y tata soltero di tres yiu bibando na Silver Spring, Maryland, awo ta ricibi inmunoterapia. E mester haci scan cada tres luna y lo ricibi chekeo frecuente di su cuero pa resto di su bida, pasobra tin riesgo halto di reocurencia, el a bisa.

Alrededor di 25% di tur melanoma ta tuma luga na cabes y nek, segun Dr. Brian Gastman, director ciruhano di e Programa di Melanoma y Cancer di Cuero di Riesgo Halto na Clinica Cleveland na Ohio. El a referi na melanoma na horea como ‘extremadamente comun’, recordando un caso unda el a elimina alrededor di dos tercer parti di horea di e pashent.

“E ta ‘sneaky’. E horea mes ta un structura ondula… tin biaha (melanoma aki) ta haya pa motibo di sangramento of dolor”, Gastman a bisa. “E problema cu horea ta probablemente cu di tur sitio na curpa, ningun otro cu horea ta conecta mediante asina hopi canal cu nos ta yama linfatico na e lymph nodes.”

Manera hopi hende, Gupman a protege su cara cu sunscreen pero no a pensa di aplica esaki na su horea. E gusta ta pafo y ta recorda kayaking bao solo durante 45 dia. “Pa algun motibo mi nunca a pensa riba e horea como algo cu mester protege. Mi nunca a kima mi horea den solo”, el a bisa.