Psicologo Dimitri Halley: “Mientras mas bo ta sconde depresion, mas fuerte e ta bira”

Awe den oranan di mainta Aruba a conoce un di e noticianan mas lamentabel di e aña aki, esun di un hoben cu den silencio tabata purba di lucha pa sigui bay dilanti pero depresion a gana e bataya ora el a dicidi di no biba mas.

Mirando e hecho aki y pa informa di un manera responsabel basa riba prevencion, Bon Dia Aruba a tuma contacto cu e psicologo Dimitri Halley ken a splica cu esaki a causa un shock basta grandi den comunidad, incluyendo personal di hotel y turistanan cu tabata na e luga ora e hecho a sucede, ora un persona no por procesa un evento traumatico.

Segun el a indica, e ta kere cu esaki ta un sla hopi duro pa hopi hende y pa esunnan cu a sigui e postnan cu e persona aki a comparti riba Facebook na unda por a mira cu el a causa un shock basta grandi ora el a skirbi cu e tabata sinti cu el a faya, pa motibo cu el a sconde su depresion.

Depresion ta un manifestacion di un problema mas profundo, e por bin for di perde un persona stima, di abuso, di sufri violencia, entre otro.

“E problema ta cu nos no tin cu sconde e depresion y sentimentonan, mas bo ta scondel’e mas fuerte e ta bira”, Halley a señala.

Asina mes, el a comenta cu e manera di bin trece e depresion of e tipo di casonan asina riba nivel di cuido mental nacional ta fout, pa motibo cu comunidad no ta wak e cos aki manera mester ta, ora un hende cu ta sufri depresion of trauma y tin un bida full reprimi y e ta expresa su sentimentonan e no ta bay haci’e di un manera bunita, tin e tendencia di tapa e sentimentonan y tapa e depresion hasta cu droga psikiatrico.

Ora un persona ta wordo medica pa depresion ta haya medicina cu e ta keda manera droga na unda nan no ta sinti lo cual nan tin cu sinti y si ora un persona ta expresa su sentimento di un manera fuerte e ta wordo yama pa ‘loco of psicotico’.

“Esaki ta e gran eror actual mes den nos cuido mental pa depresion, e ta empeorando e situacion”, el a sigura.

Den e mensahe riba Facebook di e hoben aki por a wak cu el a sconde su depresion pa tur hende y tabata kere cu asina e lo por a combati’e, ta hopi importante pa e mensahe aki sali”, Halley a bisa.

Aworaki e pais mester un otro manera pa deal cu emocionnan y sentimentonan di depresion cu a keda di trauma, “un parti di e mensahe ta hasta simbolico, na unda el a bisa cu e kier cu e mensahe ey sali pa pueblo” na e unda e pueblo mes ta bay ripara kico a pasa na unda un persona no por sconde e sentimentonan aki.

Ora e noticia a keda conoci y hasta a keda graba den un live riba Facebook, algun personanan a cuminsa manda e video na e momento precies cu el a bula for di edificio di hotel, esaki ta loke a causa e shock y ta bay sigui plama, mesun situacion cu a pasa cuater aña pasa cu dos mucha chikito di fam Anastacia, unda esey tambe a manda e pueblo den shock.

“E caso aki tambe ta bay causa un efecto asina, ta un temblor emocional, pero full pueblo mester compronde tambe cu e hendenan mester haya un chens pa nan expresa nan mes” Halley a comenta.

Igualmente, esaki tampoco ta nifica cu no mester sconde loke a sucede, na Aruba tin hopi cos cu ta keda scondi pa motibo di turismo.

Mundo completo a bay den un proceso hopi dificil pa loke ta trata pandemia di Covid-19, ta hopi cos cu a wordo tapa pa hopi tempo y ta wordo desvela aworaki, esey ta bay causa cu ta bin panico y hende ta bay cuminsa wak cosnan cu pa basta tempo no kier a wak.

“Nos ta den un tempo historico unda ta bay tin un desvelo y nos ta bay cuminsa wak cosnan mas duidelijk cu antes no tabata wak” Halley a bisa y ademas a afirma cu eynan mester enfoca riba con ta bay yuda realmente e pueblo psicologicamente y pa maneha tur cos cu ta saliendo riba un nivel emocional.

Pa via di esaki ta bay bin mas problemanan emocional y mental, pero e hende no mester cay den vicio como por ehemplo, droga of alcohol y ta p’esey cu mester bin un cuido mental real y no esun cu tin na e momentonan aki.

Respaldo, instancia cu ta encarga di cuido mental na Aruba algun simannan pasa a bati alarma pa e situacion cu salud mental tin na e momentonan aki cu ta birando pio y cu lo sigui empeora segun nan cifranan, pa cu esaki, Halley a expresa cu mester papia di e contenido di e cuido cu ta e problema mes, na unda e medicamentonan ta pone e hende na un estado di ‘zombie’.

Den psicologia profundo cu ta e specialidad di Halley y cu e ta aplica, den un estado asina e persona no por saca nan sentimento y emocion afo, ademas cu si e persona ta indica cu e ta un ‘suicide’ e lo haya mas droga en bes di laga e persona saca su sentimentonan.

“Respaldo mester compronde cu nan mester cambia nan cuido, e problema ta e contenido di e cuido”, Halley a menciona.

E manera con a deal cu e pandemia tabata devastador pa e pueblo, “e crisis no a wordo maneha na un manera psicologicamente adecua” na Hulanda mes a wordo bisa cu e maneho a faya, manera otro paisnan na mundo pa via cu a kita libertad di hende, e miedo pa e virus no a wordo maneha bon tampoco.

Di mesun manera, el a indica cu pueblo no a wordo yuda cu trauma, e metodologia pa cu trauma a faya pasobra e no ta bay mas den e sentido di tapa, di pensa positivo, pa yuda e pueblo con por lubida tur e trauma y un ehemplo ta e problema di abuso sexual cu den ultimo tempo a bin dilanti.

“Nos mester di un acercamiento pa esaki hopi mas profundo, no pa siña e hendenan den e circuito con pa detecta abuso cerca mucha, e gran mayoria di e pueblo tin cu bay den un proceso di terapia pa nan mes saca afo nan traumanan”, Halley a declara.

Esaki ta pa motibo cu tin hende cu a pasa den abuso sexual cu no ta corda, nan a bay den un proceso desociativo pa no wak kico a pasa pasobra e ta mucho duro pa nan procesa, y lo cual nan ta sconde esey ta bira pio.

Mester bin cu un programa na unda por detecta unda tin depresion, pero no pa bay den esey so ni wak di na unda e depresion ta saliendo y e caso aki, segun loke Halley a expresa, e ta kere cu ta bay haci e mesun efecto cu e caso di Natalee Holloway na 2005 pa loke ta trata turismo y pa e hotel mes tambe.

E frontliners di sector turistico cu ta hendenan cu ta deal cu e turista directo mester un programa pa nan salud mental pa motibo cu nan ta mas importante cu e top, “nos mester para keto cu e cos aki por tambalea full e sector tambe cu bo ta depende tanto riba dje”, el a finalisa.