Pa medio di e relato di prensa aki, CMMA kier introduci su mes na pueblo di Aruba. E Centro di Coordinacion pa asuntonan di Traficacion y Contrabanda di Hende (CMMA) ta e punto central pa tur cos cu ta relata na e crimen di Traficacion di Hende (Mensenhandel) y Contrabanda di Hende (Mensensmokkel) na Aruba. CMMA ta existi pa ricibi y duna informacion, educa pueblo dor di training y campañanan y asisti victimanan di traficacion.
For di 2007 gobierno di Aruba a declara cu e bataya conta Traficacion y Contrabanda di Hende ta hopi importante y na aña 2008 Aruba a haya su Coordinador Nacional contra Traficacion y Contrabanda di Hende. Hopi progreso a wordo haci y Aruba a logra mas cu un reconocimento internacional pa e trabaonan cu nos a haci na beneficio di combatimento di e crimennan aki. A crea un Taskforce pa duna gobierno di Aruba conseho y un Unidad specifico na KPA pa investiga casonan.
CMMA kier introduci su mes cu un ‘jingle’ cu ta splica ken nos ta, kico nos ta haci y con por comunica cu nos. E jingle a wordo traha dor di e conocido Janiro ‘Ataniro’ Eijsden y a wordo publica via social media. Nos ta pidi bo persona encarecidamente pa yuda nos comparti e mensahe aki via bo medio. Hunto nos por logra combati e tipo di crimen aki ariba nos dushi Aruba.
Por comunica cu CMMA via E-mail: info@cmmaruba.com of via Facebook. Pa cualkier pregunta por contact 5975223 (oranan di oficina) y pa yudansa urgente por tuma contacto riba 592-3231 (hotline 24/7).
