Ayera durante un conferencia di prensa di minister di Enseñansa, Ciencia y Desaroyo Sostenibel, Armando Rudy Lampe, a anuncia e cambio di nomber di Emma School y Scol Paso pa Futuro, cu awor a bira Scol Soeur Juliette.

Lampe a splica cu den e decreto ministerial na unda a keda acorda e cambio di nomber di e dos scol aki ta tuma na cuenta tanto e logo di Emma School como esun di Scol Paso pa Futuro den e cambio di ‘rebranding’. Esaki ta den termino di marketing y ta un strategia hopi usa, na unda un nomber, diseño y concepto di un marca ta wordo cambia cu e combinacion di esunnan anterior, cu e intencion di desaroya un identidad nobo.

Scolnan special ta haya un cierto percepcion den comunidad, loke ta parce cu ta algo “menos positivo”, segun Lampe a indica. El a agrega cu aworaki e percepcion ey no mester ta asina.

“Tur mucha ta inteligente, solamente cu tin diferente forma di inteligencia”, el a afirma.

Pa e motibo ey, muchanan special aki nan inteligencia emocional y spiritual pa hopi biaha ta mas desaroya compara cu esun di otro muchanan. Lampe a señala cu e rebranding nan kier pa no wak e muchanan aki na prome luga cu su IQ so, sino nan kier pa comunidad por mira e mucha di un manera integral.

Awor, Scol Soeur Juliette ta bay bira un scol nan unda e muchanan ta bay haya e oportunidad pa desaroya e otro habilidadnan cu talbes no tin na otro scol.

Lampe a conta cu algun tempo pasa, prome cu Covid-19, el a anuncia cu e kier pa e bijbel di Prenchi integral – cu pa prome biaha a wordo traduci na Papiamento door di un traductor local –por drenta den tur scol publico. El a indica cu esaki “no ta pa siña religion na scol publico. Nos ta siguiendo e idea di Nacionnan Uni cu a bin cu e proyecto di balornan universal,” unda ta bisa cu tur religion ta comparti e mesun balor universal.

Tambe el a bisa cu nan a pone esaki na disposicion di scol special y cu lo bay ta algo hopi importante, pa motibo cu e muchanan aki ta bay bira excelente cu un persona por sinti esey den muchanan aki.

Di e mesun forma, el a sigura cu esaki ta bay inicia un era nobo pa enseñansa special cu e cambio di e nomber aki, pa motibo cu pa prome biaha ta bay tin diploma pa ora muchanan special caba nan enseñansa primario y secundario.

“Pa decadanan esey no tabata posibel na Aruba”, Lampe a comenta. Ademas el a trece dilanti cu tin un inspector di enseñansa cu ta inspecciona scolnan primario y secundario pa muchanan special na unda tur mucha tin cu cumpli cu tur rekisito pa por haya nan diploma.

E idea di e diploma ta pa crea mas oportunidad, aworaki hunto cu SEPB nan lo ofrece un middle opleiding ora e mucha tin 16 aña pa asina nan por caba SPO y nan por sigui, ta bay tin otro opleiding pa ora nan lo cumpli 18 na unda nan por scoge diferente curso den ramo di ofishi cu nan a scoge.

Nan tambe a ripara cu e parti musical, artistico of di pintamento ta mas fuerte cerca e muchanan aki, pa nan mente por bira mas creativo y ta habri posibilidad pa nan sigui nan estudio.

E motibo dicon e nomber di scol a wordo cambia, segun Lampe na un scol publico no ta trata di bay enseña religion, sino e balornan universal manera el a menciona caba y den e caso aki e nomber di Soeur Juliette y kico e ta representa.

Soeur Juliette (Sixta Justa Cicilia) a nace na aña 1936 na Boneiro pero el a haci di Aruba su cas, Lampe a trece dilanti cu nan a scoge e fecha 29 di april pa motibo cu el a drenta na un convento na Hulanda e dia 30 di april di 1959, lo cual ta nifica cu awe e ta cumpli 59 aña desde e dia cu el a huramenta dilanti Dios cu e lo cumpli cu e votonan religioso.

Despues di un tempo el a bin traha na Aruba y a cuminsa duna les na Maria College MAVO,na unda a duna les di Ingles y Frances, el inicia e comunidad religioso di Soeurnan Dominicanese Salida di Solo y ora cu soeurnan a bay back na Hulanda e convento Salida di Solo a sigui dedica na enseñansa.

Di loke ta trata e parke cu tin paden di instalacionnan di antiguo Emmaschool, Lampe a splica cu esey lo ta bay keda mesun cos, aworaki nan ta bezig cu cambionan di infrastructura, drecha e cura di scol por ehempel, pa cu den futuro tambe nan lo por haya airco na unda el a sigura cu nan ta drechando tur e sistema di coriente cu tabata antiguo pa asina nan por haya internet.

El a enfatisa cu e kier pa e cooperacion entre Emmaschool y Paso pa Futuro continua pa asina por duna un miho servicio pa e muchanan.