Ki dia nos politiconan… Ta cuminza papia asunto real…?

Nos ta na menos di dos luna di e fecha di eleccion y ainda nos no ta mira ni tende tanto detaye den e discursonan di e partidonan cu ta bay participa na eleccion. Den diferente entrevista cu e politiconan mas destaca, segun nos opinion falta ainda e parti unda ta bay atende e aspectonan cu realmente ta di interes. Por ehemplo, nos por tende cu practicamente tur hende ta bay drecha enseñanza, cu enberdad ta den un situacion horible. Pregunta ta: unda ta bay cuminza? Cu recurso financiero limita ta interesante pa sa na kico kier gasta, disculpa, inverti e placa ey pa e tin mayor rendimento a corto y mediano plazo. Si un politico ta insisti cu mester drecha tur cos pareu, e por tin razon den e sentido cu na tur nivel tin problema grandi, pero alavez ta duna di conoce cu pa loke ta realismo e no ta score asina halto.

Segun nos opinion lo mester cuminza cu mehora calidad en general di nos enseñanza basico, mehorando e calidad di e cuerpo di docente y treciendo claridad den e asunto di idioma. Si nos no ta drecha nada eynan, nos ta keda manda alumno mal prepara pa enseñanza secundario. Nos sa cu ta bin inmediatamente e reaccion di “pero e cos aki ta bay tuma 10 aña”… Si, anto kico? Ta posible pa nos drecha den un par di aña loke a tuma varios decada pa daña? Ta bira tempo pa nos laga wega politico un banda y cuminza pensa na nivel di un berdadero pais envez di ta actua na nivel di ‘pueblecito’ cu yen di ataque personal cu no tin ningun sentido ora ta trata di discuti asunto serio.

Asina tambe nos ta haya falta di comentario mas al caso di e situacion financiero di gobierno y kico realmente ta e asuntonan clave cu e partidonan kier bay atende como prioridad. Ora ta discuti gasto di personal por ehemplo, mester tuma na cuenta cu e conocido 10% di GDP cu gobierno por dedica na gasto di personal, na e momento aki ta duna un imagen bastante diferente cu na 2019. E aña ey segun gobierno a gasta Afl. 427,7 miyon na personal, pero esaki ta sin tuma na cuenta e suma grandi pa e sectornan subsidia (eneseñanza no publico y sector social) cu ta sigur mas di Afl. 150 miyon. Djis pa mantene esey den memoria: na 2020, si no tabatin crisis di Covid-19, gobierno lo a dedica Afl. 733 miyon na salario, pa alrededor di 8.000 persona, loke tabata casi 50% di e presupuesto total. No ta promer biaha cu nos ta comenta esaki pero nos ta ripara cu tin e tendencia di lubida e realidad aki. Pero, hasta e suma menciona di 427,7 miyon, di un GDP 2020 cu segun gobierno mes a cay te na Afl. 4049 miyon, ta representa mas di 10% di GDP. Imagina awor cu nos ta conta e subsidio di salario acerca y nos ta yega na mas di 12%, loke den e acuerdo cu Hulanda tambe ta menciona. Punto ta cu mester bin un cambio cualitativo, na solamente eun mehoracion den placa gasta y cupo di trabao salba. Principalmente loke mester drecha ta e servicio abismal cu gran parti di e departamentonan ta duna na pueblo.

Tambe den hopi entrevista ta papia di diversifica nos economia, y realmente nos no ta tende tanto alternativa viable. Esey no ta straña nos nada, pasobra di mes tin masha poco cos cu por haci pa diversifica. Aki cada vez nos ta topa cu e pensamento eroneo cu cualkier actividad economico cu no ta turismo ta representa ‘diversificacion di economia’ pero esey no ta asina. Nos mester concentra riba actividad economico cu ta trece divisa aden, no algo cu ta ‘piggyback’ riba ganancia cu turismo ta trece aden, pasobra si e negoshi ta exitoso mes, ta pasobra un otro ta sufri pasobra ta placa cu ta gasta un biaha so. Ta tanto placa tin como poder di compra. Y e realismo di proyecto di refineria y cannabis ta di tal indole cu no mester comenta mas di esey.

Otro tema importante pa henter pueblo ta cu den e proximo añanan nos lo mester bay paga mas pa AZV. Nos por keda core pa e problema aki, pero esey no ta yuda, e no ta desaparece por arte de magia. Nos por mira den e proyeccionnan cu IMF ta presenta den nan rapport di e aña aki, cu despues di compensa deficit ainda na 2021 pa AZV di Afl. 84 miyon, tin proyecta pa e siguiente añanan te 2026 “0 florin”… Kico esey ta bisa? Cu cera e budget di AZV, cu gastonan creciente di tur manera, lo mester bin di nos cartera… Si nos no ta dispuesto di paga mas, anto lo mester corta severamente den e paquete di servicio cu e seguro medico ta brinda. Cuanto politico nos a tende ta atende e temanan aki? Nan lo bisa cu awor nan no kier perde voto contando hende kico mester bay sucede, pero cu despues di eleccion nan lo enfrenta e problemanan cu tin… Y ta ken ta kere nan? No ta e politiconan so mester bira mas realista, pueblo votador tambe. Si no, nan ta sigui conta storia.