Despues di mas di un luna cu un grupo di personanan Venezolano tabata wardando pa bay Venezuela, ayera den oranan di mainta nan a reuni na aeropuerto Reina Beatrix pa asina nan por regresa na su pais cu e plan di regreso boluntario di DIMAS.
Ministerio di Husticia, Siguridad y Integracion conhuntamente cu otro instancianan a bin pone nan esfuersonan for di un aña pasa na e programa di asistencia di Regreso Boluntario e cual DIMAS ta encarga cu registracion y coordinacion di e programa aki.
Di mesun manera tambe tabata presente na aeropuerto e personal di Guarda Nos Costa (GNC) na unda cu un protocol di siguridad hopi stricto e personanan cu tabata deteni a yega den diferente autonan di GNC y despues nan a wordo hiba paden pa asina nan por completa e proceso di deportacion.
Den e grupo aki e mayoria di personanan a drenta na isla di manera ilegal cu boto y nan a keda deteni den GNC pa asina ora e vuelo humanitario aki tuma luga nan por bay back na su pais cu ta Venezuela.
Haci un luna y un siman, tabatin un vuelo humanitario registra di e programa Regreso Boluntario pa Venezuela pero esey no a tuma luga, manera comunidad por a mira na diferente medionan di comunicacion e grupo di personanan aki a haci bishita na Consulado di Venezuela, tambe nan a bay DIMAS pa mustra nan mal contento y asina e proceso di regreso por cuminsa back.
Tambe a keda conoci cu esaki tabata tin di haber cu autoridadnan Venezolano cu pa algun of otro motibo nan no a duna autorisacion pa e avion cu mester a bin Aruba pa bin busca e personanan aki, acusacionnan a bin dilanti pa aerolinea Laser na unda tambe su actuacion a wordo cuestiona.
Segun informacion cu Bon Dia Aruba a haya for di un fuente, algun di e personanan no tabatin trabou ni un luga pa keda y cu e suspension di e vuelo su situacion a bira pio pa loke ta trata estadia y mantencion, ayera finalmente e vuelo pa Venezuela a tuma luga.
Di otro banda, tambe a keda conoci cu 18 di april pasa, un persona a huy for di GNC y el a wordo deteni despues na area di Sero Pita.
Den e caso aki, no ta trata di un persona sin documentonan na ordo sino di un ex-detenido cu a comete e delito di horta cu arma di candela di nacionalidad Venezolano.
E persona aki tabata cla pa lo wordo expulsa for di Aruba, ademas di esey a wordo informa cu no lo wordo deporta di manera normal como otro detenidonan sino cu e ta keda como expulsa for di e isla.
Un persona cu a wordo deporta por bin back na Aruba di bishita cumpliendo un serie di condicionnan y despues di algun añanan, pero un persona expulsa ta nifica algo mayor, e no por drenta na isla nunca mas di ningun otro manera.
