Den nos analisis di fin di aña nos no a bay ainda ariba e tema di situacion financiero gubernamental. Esaki por ta parce mahamento, pero nos ta tuma e riesgo cu algun hende lo pensa esey. En realidad, e ta demasiado importante pa no dedica atencion na esaki. Pero manera cu hopi cos malo, ora bo haya bo confronta hopi cu ne, bo ta cuminsa custumbra cu e t’ey y e no ta bay di su mes tampoco. Pero esaki ta un malesa dificil pa siña biba cu ne. Y ki ora e ta bira importante?

 

Ora cu den aña 2017, tur partido lo bay ofrece nos cielo y tera, cu programa bunita, cu hende sabi a traha riba nan. Na e momento ey nos mester haci nos pregunta clave:”en wie gaat dat betalen?” Y esaki no ta conta pa e partido actualmente den gobierno so, cu en berdad ta custumbra di haci tur sorto di promesa, pero ta poco debil den e departamento di ‘delivery’. E ta conta tambe pa esunnan cu ta aspira bira gobierno den e proximo periodo. Nos no ta custumbra cu e partidonan ta duna nos un bista riba con nan tin pensa di maniobra cu placa, pa por paga e asuntonan cu nan ta mira como prioridad.

 

Den teoria ta facil pa bisa cu “nos ta kita dies miyon aki, y nos ta pone aya”. Den practica e cosnan aki no ta asina facil. Nos ta corda cu den campaña di 2009 e partido actualmente den gobierno tabata campaña cu su ‘presupuesto alternativo’. E pensamento riba cual e tabata basa no tabata asina malo, pero e tabata carece di implementacion practico. Un ehemplo: bo ta bisa bo ta kita 20 miyon digamos di Obra Publico, y bo ta bay uz’e den Enseñansa. Bunita pensa, pero kico bo ta haci cu e parti di empleo cu ta bay perdi na un banda? Pasobra bo no por pasa nan pa enseñansa pasobra pa bo programa den e sector ey lo bo mester emplea otro hende, profesional den e ramo ey. Anto, kico bo ta haci cu e hendenan ey? Kita nan for di trabao? No pone nos hari, pasobra niun partido ta haci esey, punto. Ta p’esey cu lo ta importante cu e publico ta cuminsa exigi di mira plan acompaña pa cifra, y cifra real por fabor. Y e consecuencianan di e implementacion.

 

Pero, papiando di cifra real, nos pregunta clave, di con ta bay paga tur e soñonan bunita aki, ta bin dilanti atrobe. Y hunto cu ne, e situacion economico y financiero di nos pais. Unda nos ta para? Despues di e intervencion Hulandes na 2014, a diseña un ruta pa Aruba sali for di e ‘callejón sin salida’ cu nos tabata aden, bayendo den direccion di un abismo financiero, cu lo a hinca nos den un situacion dificil pa decadanan. E intervencion Hulandes a preveni lo peor, pero cu esey e nubianan scur no a disparce. Y cu esey e consecuencianan pa decadanan tampoco a disparce, pa e simpel motibo cu un parti di e daño ta haci caba y nos tin un peso pa carga cu nos den e proximo binti aña, si no ta mas.

Como agravante ta bin acerca cu gobierno a haya ta bon pa financia fuera di presupuesto casi un biyon na proyecto ‘PPP’, cu tambe den e proximo dos decadanan mester keda paga. Esey en berdad ta suma cinco biyon di debe, cu ta e punto di salida e aña cu ta bin. E partido den gobierno por wel di haci chuerche di oposicion cu nan ‘megadebe’, pero esey no ta yuda pa kita e megadebe for di caminda.

Y ademas, e placa grandi cu ta bay na paga debe, tanto interes como suma capital, ta den careda di 300 miyon limpi pa aña, den e proximo añanan. Eyden ta bay tur e placa extra cu nos por a dedica na e cosnan cu ta asina necesario, pero cu no ta sucede pasobra ‘gobierno no tin placa’. E programanan pa atende nos hubentud den dificultad, e creciente problema di hende di edad cu mester atencion special, nos enseñansa cu mester un aumento drastico di inversion den modernisacion, djis pa menciona algun di e cosnan cu ta sufri awor. Pa colmo, no ta papiando mes di con ta bay reduci gasto di personal den gobernacion, cu innecesariamente tambe ta un estorbo pa un dedicacion di recurso gubernamental na otro prioridad.

Y si acaso awor un politico inteligente bin bisa bo: “no worry, nos ta percura pa tin placa’, corda bon cu e unico caminda pa ranca placa extra ta for di bo cartera como ciudadano of empresario, manera a sucede caba den e ultimo añanan. Den cierto caso e poder di compra perdi a bay den algo util, manera e introduccion di un seguro di pension cu lo beneficia e empleado den sector priva a lo largo. Pero esey no ta kita cu ta placa cu e no por uza libremente awor. Lo ta bon pa den 2017 nos mantene optimismo, pero no uno ciego. Haci bo pregunta.