(DutchNews.nl) – Mas cu mita di agentenan di cas di huur ta cla pa exclui persona cu nombernan stranhero for di e propiedadnan cu nan ta ofrece, y discriminacion contra posibel huurdo cu nomber stranhero ta mas comun fuera di e ciudadnan grandi, segun investigacion nobo di ministerio di Vivienda.

E investigacion, ehecuta pa organisacionnan anti-discriminacion Art. 1 y Radar, a involucra 3mil reaccion na avisonan pa cas di huur di hasta 1,500 euro pa luna, usando nombernan Hulandes, Polaco y Marocano. E resultadonan a mustra cu den 8% di caso, un homber cu un nomber Polaco no tabata invita pa mira e propiedad, mientras si tabata invita e homber cu nomber Hulandes. Pero esaki a aumenta na 20% pafo di e cuatro ciudad Hulandes mas grandi.

E investigadornan tambe a haya cu no tabatin diferencia significante si un homber cu nomber Marocano of Hulandes tabata invita pa mira e cas den un di e cuatro ciudad mas grandi. Den pueblonan mas chikito, sinembargo, e diferencia a aumenta na 20%. E diferencia tabata mas chikito pero toch significante pa muhenan cu nomber Marocano, pero no tabatin diferencia ora un pareha gay of heterosexual a acerca un doño di cas.

Mas cu un tercer parti a bisa cu nan tabata dispuesto pa hacie, y apenas 15 a bisa cu nan no lo coopera. E resto a bisa cu lo keda na e doño di cas mes.

Minister di Vivienda, Kajsa Ollongren a yama e resultadonan ‘alarmante’. “E investigacion aki ta mustra cu discriminacion den mercado di vivienda ta nacional y no djis un problema den e ciudadnan grandi”, el a bisa.

Investigacion anterior riba e disponibilidad di agencianan pa discrimina a enfoca riba Utrecht, Amsterdam y Den Haag, y a produci resultadonan similar.

Ollongren a bisa cu awo lo intensifica esfuersonan pa combati discriminacion den vivienda. Esaki ta involucra duna autoridadnan local mas poder pa retira licencia pa doño di cas y mas scrutinio di e regulacionnan cu ta goberna agencianan di huur vivienda, el a bisa.

Asociacion di e sector, VBO, a bisa noticiero NU.nl cu mester rekeri agentenan di huur pa ley pa ta miembronan di e organisacion, pasobra esaki lo forsa nan pa cumpli cu e codigo di conducta. Tambe a pidi mas transparencia na momento di determina con ta aloca propiedadnan sin huur controla a base di trabao, entrada y situacion familiar.

Den 55 caso, doño di cas a responde na e solicitud pa mira un propiedad cu un splicacion pakico esaki no por a tuma luga. Den mita di e casonan, nan a bisa cu e apartamento tabata mucho chikito pa dos persona, pero 15 doño di cas a responde cu nan ta huur solamente na expats. E investigadonan a destaca cu esaki tambe por conduci na discriminacion indirecto door di exclui otronan cu tambe ta cualifica pa e propiedad.

Persona cu nomber Polaco tambe tabatin mayor probabilidad di ricibi un contesta na Ingles, casi mita di cual a bin di agencianan di huur na Amsterdam.