Durante un conferencia di prensa di gobierno, prome minister Evelyn Wever-Croes a anuncia cu for di dia 26 di april lo tin un flexibilisacion di medidanan di prevencion di Covid-19.

El a menciona cu den e cifranan di ultimo dianan por a mira cu te cu dia 22 di april tabatin 350 caso activo di Covid-19 na Aruba, asina mes el a bisa cu e cifra ta halto ainda pero si ta compara esey cu e situacion di dia 1 di april e cifra tabata 704 caso activo.

For di 1 te cu dia 22 a logra baha e cantidad di casonan activo pero ainda tin un averahe di 36 caso nobo pa dia, loke ta nifica cu e riesgo t’ey y e peliger t’ey ainda.

Di loke ta trata e situacion na hospital, prome minister a indica cu te ayera diabierna tabatin 32 persona den hospital y 95 persona a fayece desde cu pandemia a cuminsa.

Ora di tuma un decision pa flexibilisa e medidanan, nan ta mira tambe e situacion di vacunanan y e sistema cu nan ta bin haciendo pa vacuna comunidad y cu te cu diahuebs tabatin 45.066 persona cu a vacuna caba loke ta representa mas o menos 54% di e poblacion y 52.488 cu a registra na Aruba Health App.

E cambionan den e maneho di Covid-19 entrante dialuna awor 26 di april ta lo siguiente:

  • Orario di ciere pa establecimentonan a cambia pa 10or di anochi.
  • Toque de queda ta cuminsa 11or di anochi.
  • Gebiedsverbod ta cuminsa 7or y mey di anochi.
  • Gymnan por habri segun protocol stricto
  • Ta permiti pa haci Drive Thru y Drive-by.

Prome minister a comenta cu nan a yega na e cambionan aki despues di tin hopi bon reunionnan cu e gremio di diferente areanan, minister di Economia y Finanzas Xiomara Maduro hunto cu gremio comercial y Crisis Team ta sinta tur siman pa delibera pa evalua e pasonan y mira con pa yega na e meta cu ta e vacunacion di 85% di e poblacion.

El a trece dilanti un comparacion cu Corsou na unda el a splica cu e isla ruman na comienso di maart tabatin 90 caso activo y ora nan tabata den pleno campaña electoral faltando dos ultimo siman por a mira con eleccion y campaña electoral a wordo hiba na Corsou cu hopi bishitanan na cas, hopi aglomeracion y masha poco tapa boca.

Na Corsou desde comienso di maart cu nan caso tabata na 90, dia 14 di maart nan a yega te 373 caso y for di e dia e casonan a subi te 4.700 te dia di awe door di campaña electoral y cu aworaki nan a baha te 1.900.

Di e cantidad di personanan cu a fayece, prome cu e brote na Corsou door di eleccion nan a keda pa basta tempo na un cantidad di 22 persona cu a fayece, ora cu nan a yega na 4.700 caso nan a yega na 66 persona fayecido y awor nan tin 99.

Asina mes el a sigura cu e no kier pa Aruba yega na e mesun situacion ey y ta p’esey cu comunidad mester sa cu si tin un brote nobo tur hende mester sacrifica atrobe y e recuperacion economico cu ta tumando luga esey por wordo perdi.

Ta falta nuebe siman pa eleccion na Aruba na unda e medidanan ta wordo flexibilisa y lo por tin bishitanan na cas pero te ainda no, segun loke prome minister a menciona. Tin maneranan pa hiba campaña politico y e partidonan ta den consulta cu Cuerpo Policial, Crisis Team y Bureau Rampenbestrijding Aruba tur siman.

Pero na e momento cu un persona ta bay bishita otro di cas pa cas, si un persona tin e virus e por wordo transmiti esey pa 25 hende of mas, mesun cos cu por a pasa na december cu dande “esey ta un riesgo real” prome minister a señala.

Pa controla esaki, el a afirma cu ora un persona ta den su cas y un otro persona ta yega pa haci un bishita, e persona mes ta dicidi si e ta laga drenta e bishita of no, e regla segun e decreto ministerial ta bisa cu no ta permiti bishita na cas cu excepcion di bishita di famia, di cuido y di dokter, e tres akinan so ta wordo permiti y si un persona ta viola esaki por tin consecuencianan administrativo riba dje y cu “no tin polis pa pone para na cas di cada hende y ademas polis no tin e autoridad ey, nan por drenta na cas si nan tin un orden”.

Ta p’esey cu el a haci un apelacion pa tur politico pa mustra e responsabilidad, pa compronde cu e situacion ta serio.

Tambe, partidonan politico por usa e manera di drive thru of drive by pa haci campaña pero tambe nan a wordo informa riba e riesgonan y cu nan mester percura pa e reglanan di higiena.