Solicitud di referendum na 2016 tabata menos activo

Na 2016 tabatin menos referendum si nos ta compara nan cu e aña anterior. Na 2015 departamento di Mediador di Gobierno a ricibi un total 15 solicitud di referendum; kiermen trahadonan cu kier a organisa nan mes sindicalmente. Mayoria di e referendum aki a wordo pidi pa sindicato FTA  y sindicato STA.

E aña aki e cantidad di peticion di referendum ta  menos cu mita di e cantidad pidi na 2015. Segun Mediador di Gobierno, Anselmo Pontilius entre 8 pa 9 referendum nan a wordo atendi cu ne; y te hasta algun di nan a wordo candela. Cada aña e cantidad di referendum ta varia pa ehempel na 2014 tabatin solamente 7 referendum. “Tin periodonan mas activo cu otro y depende con e trahado ta organisa su mes.”

Cada aña e ta un  situacion dificil pa predeci, ya cu tur cos ta depende di e grupo di trahado mes cu ta dicidi cu nan kier organisa nan mes. Encuanto si un referendum por tuma luga pa departamentonan of den general –segun sr. Pontilius- tabatin obhecion legal riba e punto aki durante 2016. Pero den sentencia hopi clave hues a bisa cu e referendum pa departamentonan tambe por. Di su banda, Mediador di Gobierno como institucion ta prefera cu e referendum por tuma luga di un solo biaha.

Otro aspecto cu e cantidad di mediacion cu a tuma luga durante 2016.  Tin mediacion “oficial” kiermen esun cu Mediador di Gobierno ta ofrece su servicio pa busca alternativa y solucion na un conflicto of impasse laboral. E ta un peticion formal sea di e sindicato of dunado di trabou pa sinta na mesa cu e partidonan.  Pero tambe tin mediacion “no oficial” cu ta esun cu Mediador di Gobierno ta brinda cierto consehonan na e partidonan. Mayoria di biaha cu nan ta pidi intermediacion tin di haber cu e negociacion di e pakete financiero, duracion di e contracto colectivo (CAO).

Contracto colectivo (CAO)

Aña 2016 a habri cu diferente CAO den e sector priva; pero tambe den companianan estatal. Ta e caso di e mediacion cu Mediador di Gobierno a duna den e negociacion di CAO entre STA y gerencia di Triple A. Otro negociacion tin di haber cu gerencia di Elmar y sindicato UEA. Tambe e negociacion di CAO entre STA y ANSA. Un ultimo cu nos a conoce y cu tabatin accion di e trahadonan tabata esun di WEB y sindicato SIWA.  Tur di nan a yega na acuerdo pa  CAO di  tres pa cuater aña  di duracion.