(NLTimes) – Prome Minister Hulandes, Mark Rutte a bisa cu e pais lo continua cu e prome stap di un plan di seis stap pa libera e pais di su lockdown, incluyendo eliminacion di toque de queda y apertura limita di terras di cafés.
Rutte a haci e anuncio durante un conferencia di prensa di 70 minuut ayera, mesun dia cu e cantidad di pashent di Covid-19 den hospital a aumenta na su nivel mas halto den mas cu 100 dia, y cu un porcentahe mas halto di hende a test positivo pa infeccion di coronavirus SARS-CoV-2.
“Diadomingo ultimo, presidente di Conseho di Seguridad, Hubert Bruls a papia palabranan sabio ora el a bisa cu nos no por sali di e crisis aki cu cero riesgo”, Rutte a bisa durante su comentarionan di apertura. “E riesgo mester ta hustifica, y esey ta keda un acto di balans pa awo. Nos mester ta cauteloso: Nos debe esey na hende den cuido di salud, cu ta trahando shift dobbel, mirando nan vakantie desaparece y ta solamente core, core, core.”
Yamando esaki un ‘riesgo calcula’, Rutte a bisa: “E no ta un gamble. Nos tabata kier a tuma e prome stap di e plan di apertura ora nos a pasa e peak. Di otro banda, nos ta mira un stabilisacion averahe di e cantidad di admision di hospital, y den modelonan di RIVM nos ta pronostica un reduccion den e cantidad di admision diario.”
Sinembargo, anteriormente ayera, RIVM a bisa cu e cantidad reduci di hospitalisacionnan pa Covid-19 reporta durante ultimo siman tabata pa un problema di IT, y cu e cifranan completo no tabata disponibel. Datonan di e agencia tambe a mustra cu e cantidad averahe di infeccion diario di coronavirus ta continua su tendencia di dos luna di aumento, mustrando un reduccion solamente durante Pasco, tempo cu a test menos persona, y durante un incidente di IT separa siman pasa.
Tanto Rutte como minister di Salud, Hugo de Jonge, a insisti cu Hulanda a alcansa un plateau pa loke ta infeccion y hospitalisacion. De Jonge a ricibi pregunta riba esaki ya cu e dos cifranan e siman aki tabata similar na cifranan na januari, tempo cu e pais a extende e lockdown y a introduci toque de queda.
“E gran diferencia cu e cifranan na januari ta e grado hopi mas amplio di proteccion cu nos tin awo danki na vacunacion”, De Jonge a declara. “E gruponaan vulnerabel ta hopi mas protegi, pues e riesgo awo ta aceptabel.”
Durante su comentarionan, e prome minister encarga a confirma mayoria di e informacion cu ya a leak durante ultimo siman. Rutte a anuncia seis cambio den total na e politica di lockdown di e pais, e prome siendo eliminacion di e toque de queda obligatorio tur anochi for di dia 28 di april pa 4:30am. E toque de queda tabata e prome desde Segundo Guera Mundial, y ta na vigor pa alrededor di tres luna.
Rutte tambe a bisa cu lo permiti bar, café y restaurant ricibi cliente pa prome biaha den casi seis luna. Esaki lo ta limita solamente na terras pafo, cu por ta habri di merdia te 6pm tur dia. “Mi echt lo kier por come riba un terras atrobe anochi, pero esey ainda ta iresponsabel. Tambe nos mester por mantene e fluho di persona.”
Lo permiti e terrasan atende un maximo di 50 persona. Mester tin espacio pa e clientenan ta separa pa 1.5 meter. Por pone mesanan mas cerca di otro si usa un screen pa separa nan. Adicionalmente, un mesa por tin un maximo di dos persona si nan ta di diferente hogar. Mas cliente di un solo hogar por sinta hunto na nan propio mesa.
Tur esaki ta drenta na vigor dia 28 di april, igual cu un cambio di regla pa bishita na cas. Hende lo ta permiti pa ricibi un maximo di dos hende pa dia, na luga di uno so. Rutte a bisa cu e ta compronde cu dos ainda ta masha tiki, pero e Gabinete tabata kier ta cauteloso den nan prome stap pa sali di lockdown.
Rutte no tabata ignorante di e hecho cu e relahacion lo tuma luga dia 28 di april, e dia despues di Dia di Rey. Tambe a bisa cu esey tabata lo corecto, y cu relaha e restriccionnan mas trempan no tabata bao consideracion ni ‘pa un seconde’.
Riba e mesun fecha, tambe lo permiti tiendanan no-esencial ricibi cliente sin cita. Clientenan mester bisti tapaboca, y mester ta nan so. Tiendanan mas grandi lo ta permiti un cliente pa cada 25 meter cuadra di espacio riba vloer, mientras tienda mas chikito lo permiti dos cliente cada biaha.
Entiero cu tuma luga despues di dia 28 di april lo ta permiti pa conta cu 100 persona, cual ta dobel loke ta permiti actualmente. Rutte tambe a bisa cu e examen pa rijbewijs tambe lo cuminsa back riba e fecha aki.
E ultimo cambio tabata un confirmacion cu studiantenan di educacion avansa lo ta permiti pa atende les presencial sikiera un bes pa siman cuminsando dia 26 di april. “Nos lo continua evalua con nos por manda alumno y studiante na scol mas y mas frecuentemente”, el a bisa.
“E stap cu nos ta tumando tambe ta limita. Pues e no ta un gamble, sino un riesgo aceptabel”, Rutte a bisa.
