Rodgers Beach un di e beachnan di Aruba cu ta hala basta atencion for di personanan local, turistanan y hasta YouTubers na nivel internacional, ta lamentabel cu na e momentonan aki ta pidi di manera urgente pa haya un tiki di atencion di parti di instancianan concerni.
Esaki pa motibo cu e trapi cu ta wordo utilisa como otro caminda pa yega na e beach, ta den mal condicion loke por causa un accidente cu cualkier persona sea local of turista.
Bon Dia Aruba a haya e potretnan aki for di un lector na unda por mustra con e trapi ta na e momentonan aki y e peliger cu por causa specialmente pa turistanan cu manera mandatarionan ta bisa semper “turismo ta e base fundamental di nos economia”.
Ta p’esey cu ta wordo solicita pa duna atencion na e beach aki cu ta forma parti di e districto San Nicolas na unda e ultimo dianan nos por a mira cu algun candidatonan politico ta bin haciendo campaña pa gana eleccion dia 25 di juni.
