FTA: ‘Relacion cu varios hotel no ta bayendo bon’

Den su relato di fin di aña, presidente di sindicato FTA, Hubert Dirkzs a referi na e situacion di e trahadonan hotelero for di unda e sindicato aki tin hopi miembro.

E sindicalista a laga sa cu den e transicion di 2015 pa 2016 nan tabatin dudanan con e sector hotelero lo bay, y con e ocupacion lo ta pa e sector importante di nos economia aki. E panorama tabata diversifica entre otro algun companianan kier bin cu renobacionnan. Tambe a presenta e situacion di cambio di doño den algun hotel y tambe tabatin e aspecto di “all- inclusive”, cu a wordo debati den Parlamento.

Sinembargo pa presidente di FTA loke ta keda hopi importante riba e topico di hotelnan “all- inclusive” ta cu e semper nan a duna bon resultado, pero di otro banda e aspecto di calidad di mercado ta keda un factor hopi importante, etc.

No cu mucho agrado presidente di FTA a menciona e situacion cu trahadonan di RIU hotel ta pasando aden, caminda e trahadonan a yega di protesta varios biaha ya sea paden of pafo. Pa FTA  ainda despues di hopi reunion e relacion cu Riu hotel no ta bayendo bon.

Otro situacion tin di haber cu Hilton hotel tambe caminda tin un departamento cu nan kier deshaci di dje pa laga contratistanan realisa e trabou cu e trahadonan di e departamento aki ta bin realisa. “Via contratista nos sa cu explotacion di  trahado ta tumando luga”, e ta bisa. Di otro banda sinembargo gerencia di e hotel ta desmenti esaki.

E ta denuncia cu hopi biaha e trahado aki no ta haci denuncianan, y mas cu nan ta traha pa contratista pa dificil e situacion laboral ta pa nan. P’esey mes FTA  ta kere cu e posicion di e dunado di trabou mester mira no solamente e ganashi cu e ta haci, pero e desaroyo di e pais y desaroyo di e trahadonan.

“Na final si nos ta papia di producto turistico e Arubiano a sa di duna un bon producto, duna bon servicio pa yega na loke nos a yega te aworaki cu ta un nivel di turismo asina halto”, segun presidente di FTA.

Nan a yega di recuri na e derecho di e trahadonan para den ley y nan ta pidi tur trahadonan cu a wordo acerca di cualkier empresa cu kier deshaci di un departamento of bay riba contract di corto duracion, pa nan lanta para. Segun sr. Dirkzs companianan tin tendencia di ofrece “pakete” y hopi biaha un trahado ta kere cu ta bay haya hopi placa, y cu e ta bay dura eternamente loke no ta berdad. “E placa ey ta poco y e ta caba rapido, ademas cu bo derecho ta wordo mina.”