Cuanto espacio comercial… Nos kier tin aki…?

Eleccion ta den porta y esey ta implica cu tur proyecto, di apariencia bunita o prometedor, te na esunnan di menos lucir, tur ta sali for di lachi o cashi pa yuda den atrae mas votador. No tin nada straño ni nada nobo den esey y den e campaña cortico aki gobierno tambe ta saca tur su piezanan pa ilustra kico por ta futuro di e pais aki, segun nan. Na nos, como prensa y ciudadano individual pa evalua y huzga kico tin di realismo y perspectiva den cada un di nan.

Promer cu tur cos nos mester pensa riba e cuadro general di desaroyo economico den e proximo añanan, cu ta duna posibilidad, pero tambe limite na loke ta posible. Y den esaki tin varios aspecto pa contempla. Pa cuminza, nos desaroyo economico, si tur cos bay bon, lo tuma algun aña pa hiba nos back na e situacion di aña 2019. Awor, nos tin e tendencia di tuma e situacion di e aña ey como algo tremendo, e benchmark na cual nos mester bolbe, por lo menos. Pa loke ta e cifranan general esey ta asina tambe, y si e bishitantenan ta yega na mesun cantidad o mihor den e proximo añanan, anto nos por bolbe na e situacion relativamente faborable ey. Pero, cu esey nos no ta tuma na cuenta cu den e añanan promer cu Covid a bin di bishita, ya nos tabata mira cierto señalnan cu nos modelo di economia, basa riba turismo, por haya temponan menos faborable. Nos por corda cu algun tempo pasa e organisacion di turismo di Caribe, CTO, a saca un advertencia unda nan a indica cu den e proximo añanan tin sigur 25.000 camber di hotel planea den Caribe. Y cu e preocupacion tabata cu na e momento ey e grado di ocupacion di camber den e region tabata cayendo, a pesar cu e cantidad di bishitante tabata crece… Un señal cla cu mester tuma na serio. Awor, di e 25.000 cambernan ey, casi 20% ta planea na Aruba, unda ta parce cu ni politico ni empresarionan ta tene cuenta ta con grandi, o mejor dicho, con chikito Aruba ta. Pa djis duna un comparacion: Republica Dominicana tin 11 miyon habitante, mas o menos 100 biaha mas cu Aruba. Na 2019 e pais tabatin net riba 80.000 camber, mientras Aruba ta pasando 10.000 cu e proyectonan ya bao construccion. Republica Dominicana tabatin na 2019 mas di 5 miyon turista stranhero, plus e Dominicanonan den exterior cu ta pone e cifra total na mas di 6 miyon. Un lugar cien biaha mas chikito tin mas di un miyon bishitante pa aña… Cuanto mas nos kier crece…?

No ta solamente e punto di turismo riba su mes, otro asunto ta cu turismo ta defini cuanto economia tin, cuanto negoshi por tin, deriva y den sombra di e ‘moneymaker’ grandi. Esey ta defini cuanto poder di compra tin, cu nos por gasta na loke nos ta scoge. Un cos si: si bo ta cumpra un auto nobo, talvez bo no por renoba bo cas; tin escogencia pa haci. Cu e vista aki nos mester acerca e asunto di cuanto comercio nos por tin, cu ta biba y crece riba e poder di compra disponible, tambe di e turista. Y esey ta bay defini cuanto espacio comercial nos mester. Awor, no cu asombro pero si cu e mesun preguntanan grandi nos ta mira e plannan pa desaroya e area di waf di Playa, convirtiendo esaki den un zona comercial di promer categoria. Pa por evalua esaki bon, nos mester dal un par di stap atras y contempla pasado reciente. Den añanan anterior a desplaza bon parti di actividad comercial y di diversion (nocturno) pa e area dilanti e hotelnan, loke a conduci na e despoblacion di e area comercial den Playa. Den ultimo decada e crecemento comercial den area di ‘high rise’ tabata mas fuerte cu na cualkier otro. Despues di a haci esaki, awor ta bin cu otro desaroyo comercial cu nan por a yam’e ‘back to downtown’, solamente cu e plan no ta contene un reactivacion di Caya Grandi. Esey ta parce un area perdi pa semper caba. Di tur manera, e gobierno cu ta bay dirigi Aruba desde e aña aki lo mester dicidi kico ta haci cu e area di waf, teniendo cuenta cu e hecho cu no ta sigur cu den e proximo decada nos turismo ta sigui crece manera nada no a pasa. Nos por a nota cu den e ultimo añanan ‘pre-Covid’ nos tabatin aumento di turismo a causa di e horcannan cu a devasta varis destinacion den nos region. Awor nan ta back den operacion y un simple vistazo riba estadisticanan ta mustra cu mayoria di e lunanan net promer cu Covid a dal, tabata mustra menosbishitante ‘stayover’ cu na 2018…

E pregunta strategico ta esaki: Ken nos ta kere nos ta cu aki no por bay pasa loke a pasa den tanto otro destinacion turistico? Bo por ta e ultimo pa habri algo cu ta gana placa ainda, o bo ta e promer cu ta perde placa? E dia ey mester yega, tardi o tempran. O ta bira asina cu esun ta habri, pero e otro ta cera?Contesta cla den e asuntonan aki yama planificacion…