E contrato proponi pa Quanten Consortium Aruba LLC pa compra di e refineria di Aruba ta den man di Gobierno y abogadonan ta revisando tur e detayenan. Esey ta e informacion cu Karl Welch di Quanten Consortium Aruba LLC a duna Bon Dia Aruba.
Manera ta conoci, Welch hunto cu CEO di e compania, Jeff Meyers, tabata na Aruba pa dos siman pa asina pone e ultimo detayenan pa nan oferta pa reconstrui e refineria y prome cu a bolbe Merca tabatin un ultimo reunion cu Prome Minister Evelyn Wever Croes, hunto cu Director Adhunto di RDA, Reynold Arends.
Prome Minister Wever Croes a bisa cu e no kier duna mucho informacion pasobra e mes ta hopi cauteloso y no kier crea speranza cu e refineria lo por habri. Durante e reunionnan Gobierno tabata haci pregunta riba e progreso di e trabaonan, e financiamento y si esaki ta confirma y con e refineria lo ta configura.
Un tema cu pa Gobierno tabata importante ta e cuponan di trabao cu reconstruccion y operacion di e refineria lo crea, segun Welch.
“Nos ta cabando cu e configuracion di e refineria, e OPEX ( Operation expense) y determina finalmente cual ta e productonan cu e refineria lo produci.”
Un aspecto importante cu ta inclui den e documentacionn cu a presenta na Gobierno ta e vision pa e refineria den 20 aña. “Nos ta dedica completamente na conclui e proceso aki exitosamente,” Welch a bisa. “E ta logico cu tur Arubiano ta cauteloso den kere cu esaki por bira un realidad. Esey ta e caso tambe cu Gobierno.”
E intencion ta pa e ehecutivonan di Quanten Consortium Aruba LLC bolbe Aruba den algun siman pa finalisa e proceso.
