Citgo a firma un contracto cu e compania Frances Tecnip ayera. E compania aki a gana e destaho pa haci e trabou necesario pa asina habri e refineria na San Nicolas bek.

 

10 compania a participa den e destaho di e proyecto di cual e suma te ainda no ta conoci. Segun gobierno a resta dos grupo di compania unda finalmente Citgo a scoge pa e compania Frances. Banda di e compania aki, e grupo tambe ta contene di un compania Venezolano y un otro compania Technoconsult.

Segun e informacion di gobierno e grupo ta funda na 1985 y ta haci trabou pa diferente compania di energia na Canada y tambe paisnan Latino Mericano. E grupo aki tambe a gana un destaho di PDVSA, e compania madre di Citgo pa explora e posnan den e Orinoco Belt. For di akinan e refineria lo haya su petroleo pa asina ‘upgrade’, esta mehora esaki na un producto cu ainda mester wordo finalisa den refinerianan di Citgo na Merca pa por bende riba mercado.

Segun minister Mike de Meza encarga cu e refineria, e proceso aki na Aruba di e crudo masha pisa di Orinoco no ta laga niun sushi atras na nos isla. Sinembargo tin diferente organisacion caba cu a indica cu esaki no ta e caso. Banda di esaki, e doño di e refineria, esta Refineria di Aruba cu ta 100% den man di gobierno, ya a indica cu lo traha dos landfill extra riba e tereno di refineria, banda di Fort Heuvelstraat unda ya a dump e asbestos. Un di e landfill e compania estatal mes lo bay uza, e otro ta destina pa Citgo. Kico Citgo e ora lo bay haci cu e dump aki y ki sushi lo bay dump aki, no ta conoci.

Segun gobierno e grupo di contratista bou e compania Frances lo bay cera contracto tambe cu companianan di construccion local. Sinembargo no ta conoci cuanto hende nan mes y tambe e otro companianan manera esun Venezolano lo trece Aruba di afo. Esaki ta bay parcialmente contra e maneho di e minister di Labor Paul Croes, cu a priminti cu e trahadonan Arubano lo haya preferencia den e proyecto di refineria. Con esaki awor ta hinca den otro, no ta conoci.

Bon Dia Aruba lo purba di haya comentario for di gobierno, y tambe minister di Labor den e siguiente dianan. Tambe ainda no a ricibi un contesta riba nos pregunta tocante e asunto unda PDVSA a hipoteca e accionnan di Citgo Merca.