Cifranan di presupuesto 2021 ta mustra cu en total e aña aki ministerio di Enseñanza ta mira un reduccion di su budget compara cu 2020, un tendencia di bahada cu ta parce normal den e crisis actual di Covid-19. Sin embargo, por mira den e cifranan di 2018 y 2019, manera nan ta aparece den e documento di ‘Doorlichting Onderwijs Aruba’ di cual Bon Dia Aruba ta dispone, ta mustra un reduccion di gasto grandi compara cu e añanan anterior tambe, loke ta pone pregunta surgi tocante e inversionnan necesario den enseñanza. E documento a ser elabora den cuadro di preparacion pa reforma di enseñanza manera acorda den e acuerdo entre Aruba y Hulanda, na encargo di e organismo COHO.
Tabel 1
E cifranan den e tabel aki riba, di e documento di Doorlichting, ta mustra un cifra parcial pa 2020, cu ta coresponde cu e suma te cu october 2020. E total pa 2020 ta manera presenta den e presupuesto 2021.
Tabel 2 Gasto Enseñanza (na Afl. 1000)
| Tipo di gasto | 2020 | 2021 | Dif. | % |
| Personal | 98,3 | 96,7 | -1,6 | -2% |
| Bienes & Servicio | 24,6 | 20,5 | -4,1 | -17% |
| Subsidio | 130,2 | 117,6 | -12,6 | -10% |
| Subsidio (parti di personal) | 117,2 | 102,7 | -14,5 | |
| Transferencia | 92 | 92 | 0 | 0% |
| Aporte y afschrijving | 4,4 | 4,4 | -0,005 | 0% |
| Total | 257,8 | 239,4 | -18,4 | -7% |
Fuente: Presupuesto 2021
Por constata cu e presupuesto ta mustra un reduccion considerable compara cu 2 añanan anterior, di alrededor di Afl.18,4 miyon compara cu 2020, y di Afl.36,7 miyon compara cu 2019, y Afl. 36,4 miyon compara cu 2018. Interesante ta pa haya sa unda e reduccion ta tumando lugar. Por observa cu den Tabel 1 t aparece e suma total di personal, incluyendo e sector subsidia, mientras cu den Tabel 2 (presupuesto) esaki ta separa como personal di gobierno y gran parti di e post di Subsidio. Nos a separa esaki den e tabel original y por mira cu e reduccion di e post total di salario lo ta Afl. 16,1 miyon pa 2021.
Un gran parti di e reduccion di salario ta bin pa cuenta di SEPB, cu ta perde Afl. 14,6 miyon
Reduccion di cantidad di alumno
For di e documento di e Doorlichting por deduci tambe cu e ‘ontgroening’ cu ta tumando lugar varios aña caba den nos comunidad, unda tin cada vez menos mucha ta nace, ta visible den e cifranan presenta, cu ta haci cu mester di menos facilidad y menos personal. Na aña escolar 2015/2016 tabatin en total 649 mucha mas na kleuterschool y scol basico cu na 2020/2021. Riba klasnan di 30 mucha esey ta casi 22 klas menos cu ta necesario actualmente. Un tendencia hopi fuerte mas tato den scolnan basico no publico, algo no hopi comenta den comunidad cu merece mas estudio.
Tabel 3
GDP y gasto enseñanza
E standard internacional pa gasto di enseñanza ta su comparacion cu Producto Interno Bruto (PIB; GDP) di un pais, unda 6% di GDP ta e minimo cu mester maneha. A causa di e cambionan brusco den GDP di nos pais na 2020, actualmente por mira ironeamente awor cu ni asina Aruba ta cumpli cu e norma. Na fin di 2020 Aruba su GDP tabata na Afl. 4049 miyon y na fin di 2021 ta proyecta yega na Afl. 4277 miyon. Un presupuesto di Afl. 239,8 miyon ta 5,6% di e actual GDP, mientras cu si conta segun e GDP di 2019, di Afl. 5895, ta 4,1% solamente. Conclusion ta cu ni conta cu e GDP reduci di e momento aki, nos inversion den enseñanza ta yega na e criterio minimo internacional. Ta di spera cu e Doorlichtin finalmente lo inventarisa e inversionnan necesario den cantidad y principalmente calidad necesario pa futuro.
