Ruliene Arends no ta un persona desconoci den nos comunidad, actualmente e ta trahado preventivo di Fundacion Anti Droga na FADA. Actualmente debi di e pandemia FADA a haya hopi peticion di mayor riba con nan por atende cu e asunto di video gaming na cas cu nan yiunan.

Segun Arends den e ultimo aña nan FADA a haya hopi peticion di scolnan pa charla di video gaming. FADA tin algun tempo caba ta duna informacion di esaki cerca nos hobennan. Esaki ta un topico hopi delicado pa atende cu ne debi cu ta dificil pa bisa e muchanan, y pa nan por compronde cu nan no por haci video gaming constantemente.

Sinembargo si por duna e hoben tips y conseho con nan por haci uzo di e video gaming na un uzo mas limita. Loke ta un realidad tin algun mucha cu ta bin scol cu soño y na momento cu e docente mester mira kico ta pasando ta resulta cu nan ta keda te laat lanta ta hunga cu e computer of e telefon.

Hopi biaha e mayor mes no sa di esaki debi cu e mucha tin su weganan den camber y nan ta hunga den oranan di anochi cu normalmente nan mester ta drumi. Fada ta motiva tur mucha cu ta pega cu un video gaming pa nan haci un deporte y esunnan cu ya caba ta haciendo un deporte pa nan por dedica y enfoca mas na esaki pa nan por bira e miho di e grupo cu sigur cu ta algo cu ta motiva nan tambe di por haci.

Hopi di e muchanan aki tambe nan lesnan di bay atras den e caso aki debi di e uzo di video gaming. Segun Arends ta dificil pa por kita nos hobennan completamente for di e mundo electronico , esaki ta algo casi imposibel principalmente cu den e ultimo añanan cu esey tabata e forma di comunica cu otro y haci nan les.

Sinembargo no por kita e muchanan di ta forma parti di e sistema digital , pero importante ta pa bin cu un structura cu e mayornan por bin cu ne. E mayornan ta hunga un rol hopi hopi grandi debi cu e hobennan nan celebro ainda ta den desaroyo y e mucha no ta bay wak te ki ora e tin cu keda , pero e ta bay hunga sin fin.

E mayor ta sumamente importante pa tin e control te na ki momento e mucha por hunga y na momento cu tin un structura e hobennan ta adapta na esaki unda cu nan lo por tin e structura na momento cu e mayor no ta presente.

Na momento cu a reconoce video gaming como adiccion FADA a gara esaki dibiaha y na unda a cuminsa duna informacion dibiaha na tur e scol. No ta trata solamente di e scolnan basico pero tambe na e scolnan secundario.

Rubiela Toppenberg tambe ta un trahado preventivo na Fundacion anti Droga Aruba y ta mira cu video gaming ta birando un problema aki na Aruba pero mundialmente e ta un problema tambe na diferente otro paisnan. Sinembargo FADA ta kere firmemente den prevencion y ta papia riba diferente topico cu ta encera prevencion. Den luna di April FADA ta bay lansa un programa unda cu lo haya bista mas di cerca di kico tur e video gaming aki ta encera den su totalidad.

Hopi biaha un mayor ta cumpra un di e weganan aki sin sa kico e ta y esaki ta haci e situacion mas complica. Sinembargo den e programa lo haya demostracion y lo haya entrevistanan di mayornan cu ta bibando cu un yiu unda cu video gaming a interveni su actividadnan diario unda cu ya caba no ta pensa mas den sport, scol , nan ta lubida cu nan tin cu come, nan ta lubida cu nan tin cu baña y asina por keda menciona tur loke e weganan aki ta haci cu e mucha su mundo.

Den tipo di casonan asina aki hopi biaha e mucha mes no sa cu e tin un problema. E mayor y of otro personanan cu ta cerca di e mucha ta tuma nota di e actuacionnan di e mucha y ta busca un ayudo pa e mucha debi cu e mucha mes no ta mira e peliger cu poco poco e ta bay hopi mas den dje. Den casonan extremo e docente den klas ta esun cu ta bati e bel y e mayor ta tuma nota di e puntonan di e mucha cu a bay atras y asina ta haya sa cu algo no ta canando bon cu e mucha y ta haci e investigacion riba e mucha pa nota di e señalnan cu e mucha ta haci cu su desaroyo ta bay atras.

Den tipo di casonan extremo hasta e vocabulario di e mucha ta cambia unda cu nan ta bira un poco mas vulgar y normalmente e no ta un mucha asina. Tur e partinan aki ta señalnan cu un mayor mester tene cuenta cu ne y busca ayudo pa esaki. E edad di e muchanan ta varia hopi , pero mester bisa cu desde kleuter caba , dus di 4 aña ya tin hopi mucha cu tin problema cu e mundo di tecnologia cu e generacion ta drentando den dje dia pa dia mas.

FADA su enfoke ta hopi den e grupo di 10, 12 y 16 aña cu ta hopi mas diep den e mundo di video gaming. Nos mester ta realistico tambe cu no por kita nan for di e mundo aki , pero mester por duna nan un structura y informacion , pesey FADA ta boga hopi di e parti di prevencion y si cualkier mayor of docente cu mester di informacion FADA su portanan ta habri pa duna un man pa yuda e muchanan cu ta hopi pega den e mundo di social media y video gaming