Caso Avestruz ta… Cambia panorama electoral…?

Panorama pa eleccion a bolbe cambia. Algun dia pasa tabata e caida voluntario di e gabinete di coalicion cu a sorprende nos, awor ta e dos arestonan den menos di 24 ora di persona liga na benta di tereno cu a logra haya gratuitamente di Pais Aruba. Esey no ta dificil si tin na cabez di e operacion un mandatario cu ta dispuesto pa firma, ‘a como sea’. Nos no ta pretende di predeci exactamente kico ta bay sucede den e proximo dianan, esey ta na e autoridadnan hudicial pa haci nan trabao. Pero, e hecho cu a cuminza mas abao den e ‘herarquia’ di e supuesto organizacion delincuente cu e operacion aki ta mustra pa varios aña caba, ta un indicacion cu lo bay envolve e personanan di mas peso despues. Tambe no mester exclui e posibilidad cu tin hende cu ta acudi na oficina pa duna testimonio, asina ta cu no mester core saca conclusion ora mira fulano o mengano sali di oficina di Landsrecherche. Contal cu por constata cu e investigacion di cual hopi hende a kere cu el a keda pega, loke na su turno a duna bida na diferente teoria di conspiracion, ta canando den su siguiente fase.

Claro cu seguidamente nos lo haya otro serie di teoria di conspiracion, cu ta bisa cu Ministerio Publico ta na merced di e gobierno actual, mientras cu poco dia pasa tabatin e teorianan cu tabata bisa cu OM ta conspira cu e ex-mandatarionan di e anterior gabinete pa e caso no avanza… Na Aruba bo por haya hende kere cualkier di nan. Pero enfin, tin hende tambe cu ta satisfecho cu accion hudicial ta tumando lugar, y cu e tardanza tabatin su splicacion: e ta un caso grandi. Si a kere cu e 20.000 pagina di e caso Ibis tabata impresionante, anto probablemente loke lo bay corte por ta mas cu esey, dunando asina un trabao grandi tambe na e equipo defensor cu lo mester bay pasa den tur e material aki. Y den e caso particular aki tin un tremendo ‘paper trail’ pa e caracteristica di e asunto. Ora ta trata di emision di tereno, bo mester entrega un peticion, cu ta ser tramita, di forma iregular of no, y ta emiti e permiso, cu ta conduci na un traspaso na notario, cu despues mester bay Vastgoedregistratie… Y si bo a haya un tereno pornada, pasobra bo ta bon cu e mandatario, o un di su hendenan, bo por bira bend’e cu otro, y ta bolbe bay notario, y ta bolbe bay Vastgedregistratie. Si den e proceso a kere cu ta oportuno pa lanta un negoshi pa sirbi como vehiculo, ta bay notario, y ta bay Vastgoedregistratie: un sinfin di fecha, dato y persona cu mester analisa, pa mira ki dia a haci kico y pakico.

Lastima si cu den henter e proceso te awe no a yega na cuestiona e otro aspecto den e negoshi di tereno aki. Esey ta e invento di e ‘maatschappelijke bijdrage’ cu sin base legal algun a inventa pa pone companianan cu pidi un tereno comercial, o cu kier ‘legaliza’ nan tereno erfpacht pa vivienda, cu nan a malusa como tereno comercial, paga extra. Cu e obhetivo masha bunita di un donacion na un instancia caritativo, di trabao social o meta deportivo, ta ‘ordena’ e empresa pa paga un cierto suma, stipula pa e mandatario di turno, pa paga esaki na e instancia elegi pa e mandatario. Ki dia a investiga si dentro di e miyones cu a paga den ultimo añanan na un lista largo di entidad, no tabatin caso di ‘kickback’ pa e mandatario o un persona den su alrededor? Nos no mester yega na acusa ningun hende den esaki pasobra ta suficiente pa denuncia e falta di control riba e asunto aki. Pesey tambe supuestamente nos tin nos organonan di control, cu te dia di awe, cu nos sa, no tabata envolvi den nada cu ta parce control. E practica ilegal aki ta parce mas bien loke nos por yama ‘extorsion pseudo-legal’ estilo Juan Peron. E mandatario di turno no tin nada ta exigi pago y indica ken y cuanto mester paga, mientras cu e donacion no ta regla den ley. Lo ta interesante si un instancia cu interes genuino legal entama un ‘proefproces’ pa pidi un declaracion di derecho cu e asunto aki no tin un base legal.

Pero bolbiendo na e actual investigacion; esaki a cambia e panorama politico electoral, pasobra den e siman y lunanan aki indudablemente e tema di corupcion ta bay domina e scenario di campaña. No solamente pasobra e ta un tema di importancia riba su mes, sino tambe pasobra e otro temanan tur ta relaciona cu e acuerdo cu Hulanda, unda un partido por grita algo otro, pero nos tur sa cu nan ta mara na ehecucion di e plan ey. E partido cu mas problema ta e partido cu ta mira tres di su (ex-)discipulo y ex-mandatarionan den problema serio cu husticia, y ta para dilanti e decision kico pa haci cu e lista pa bay eleccion, cu mester entrega otro luna. Mester scoge entre ‘borrón y cuenta nueva’ o sigui riba e mesun rumbo, di firme defensa di esnan envolvi den e caso historico aki.