Tribunal di Derechonan Humano Europeo a dicta un sentencia cu paisnan por haci vacunacion obligatorio pa nan ciudadano den cuadro di interes general di e pais.

Mirando cu campaña di vacunacion contra Covid-19 a cuminsa na diferente pais for di algun tempo pasa, ta existi personanan cu tin interes pa haya e vacuna y tambe tin otronan cu no ta mucho di acuerdo pa hayel’e pa diferente motibonan.

Entre algun motibo nos por destaca cu pa por fabrica un vacuna mester haci diferente proceduranan y testnan cu ta tuma su tempo y e vacunanan contra Covid-19 specificamente a wordo fabrica den tempo record, asina como tambe e motibonan dicon te ainda no por haya vacuna contra otro malesanan como por ehemplo cancer, un factor cu hopi hende no ta compronde.

Pa cu esaki, Tribunal di Estrasburgo a pronuncia riba e rekisito di vacunacion na Republica Checa, luga na unda muchanan mester wordo vacuna contra nuebe malesanan pero esaki a bin dilanti door di un fayo di un demanda di un mama na unda su dos yiu a wordo rechasa na su crèche pa no wordo vacuna.

Siman pasa, den e sala grandi di e tribunal 17 hues a afirma e sentencia cu un voto den contra, e proporcionalidad di autoridadnan ta haci obligatorio e vacunanan infantil, pa motibo cu esaki ta un medida “necesario den un sociedad democratico”.

Pa cuminsa, personanan tin derecho pa respeta nan bida priva y di nan famia, e tribunal di derechonan humano a bisa. Pero e paisnan tin hopi margen pa evalua si ta necesario reduci e derecho aki.

E tribunal a reconoce cu e pais ta persigui e obhetivo legitimo pa proteha e salud general, asina como e derechonan di tur hende, nan ta señala cu e vacunacion ta proteha tanto esunnan cu ta hay’e como esunnan cu no por wordo vacuna pa motibonan medico y ta p’esey cu nan ta depende di inmunisacion colectivo pa nan proteccion contra malesanan contagioso grave.

E sentencia ta enfatisa cu den tur decision den relacion cu muchanan, su interes mester ta di primordial importancia, pa loke tin di haber cu inmunisacion, e obhetivo mester ta cu tur mucha lo wordo protegi contra malesanan grave, mediante vacunacion of inmunisacion colectivo.

Aunke e parti di no admision di e muchanan na e crèchenan den e caso menciona por a nifica un importante perdida pa muchanan por desaroya nan personalidad, tabata un medida mas bien preventivo cu disciplinario.

Ta importante pa trece dilanti cu e fayo aki segun expertonan Europeo ta ‘sumamente valioso’ pa loke ta trata e campaña di vacunacion contra coronavirus ya cu por forsa esunnan cu ta prefera di no inmunisa pa nan haya e vacuna.

Ademas, esaki ta trece un resonancia particular manera hopi activista anti vacuna na mundo ta mustra y denuncia cu esaki por nifica “un dictadura di salud” riba e medidanan di higiena y prevencion of e efectonan secundario di e vacunacion. Tambe lo por causa un debate riba vacunacion contra covid-19 di personal medico den particular.

Tribunal di Derechonan Humano ta para firme pa su decision, incluyendo ora ta admiti consecuencianan of efectonan secundario di e vacunanan riba salud, e caracter obligatorio mester pone den perspectiva mirando cu ningun vacuna por wordo aplica bao forsa y contra e boluntad di un pashent.

Na Aruba te ainda e vacunacion no ta obligatorio pero manera a keda conoci tin personanan cu no ta confia den su eficacia asina como tambe tin algun di nan cu ta menciona e parti “cu nos no sa kico e vacuna ey tin den dje”.

Bon Dia Aruba a tuma contacto cu minister di Salud, Turismo y Deporte Dangui Oduber pa haya sa si e decision aki por wordo considera na Aruba pero, manera a bira un custumber minister Oduber no a duna un contesta pa cu esaki te e momento di e ciere di e edicion aki.

Di otro banda, te diasabra 10 di april tabatin un cantidad di 29.170 persona cu a wordo vacuna caba contra Covid-19 na Aruba, un total di 44.687 persona a registra, 17.271 a haya e prome dosis, 11.899 a haya e dos dosis y total di vacunanan aplica ta 41.069.