E ley mas importante di Aruba ta marca pa insiguridad: recuperacion economico y landspakket; Presupuesto 2021 ta tene cuenta cu ontribucion propio of eigen bijdrage

Gobierno ta comprometi na aplica e reduccion di 60 miyon pa AZV y cu ta bay tuma un decision riba e contribucion propio, esta e eigen bijdrage. Esaki ta parti di splicacion di e ley di Presupuesto 2021 cu a bay Parlamento.

Proposicion di Presupuesto 2021 ta entrega na Parlamento y ta trata di un ley cu ta un poco mas visual cu normal, manera Minister di Finanzas Xiomara Maduro a splica. Sinembargo, e situacion di COVID-19, ademas di e reformanan palabra cu Hulanda den e landspakket ta pone ta premira cu mester keda haci adaptacionnan segun tempo ta pasa.

Pa Presupuesto 2021 sinembargo, a tuma cuenta cu tres risico:

Risico economico, unda ta desvia di e pronostico macro-economico;

Risico inherente cu ta risiconan explicito, manera garantianan, casonan di corte, debe, y di otro banda, obligacion latente manera desaster natural, operacion di rescate;

Y risico institucional cu ta debilidadnan institucional cu por afecta e obhetivonan di maneho presupuestario, entre otro. A pone Presupuesto 2021 na prueba a base di e tres criteria aki.

CAft

Un di e factornan di insiguridad mas grandi den e Presupuesto 2021, mescos cu tabata e caso na 2020, ta e crecemento economico. E rumbo di recuperacion e tempo cu lo logra esaki ta desconoci. Departamento pa Asuntonan Economico y Industria, DEHZI como tal o saca pronostico nobo cada tres luna, cu por resulta den ahustacion di e presupuesto. Pais Aurba a yega cu limite si pa absorba shock y esaki en todo caso ta bisto na e nivel di debe.

Tambe a tene opinion di College Aruba Financieel Toezicht, CAft, na cuenta ora di a hinca e presupuesto den otro. Un biaha mas Gobierno di Reino a tene cuenta cu e crisis di COVID-19 y no a exigi pa Aruba mantene na e protocol di 2018, pa sigura un surplus di un (1) porciento di GDP riba e presupuesto.

Segun e splicacion, CAft a bisa cu e expectativa di crecemento di 5.6 porciento di e GDP ta un punto di salida realistico, pa calculacion di e presupuesto pa 2021, y cu Aruba a cumpli cu e norma di asto di personal.Tampoco a inclui inversion den presupuesto den cuadro di e landspakket pa Aruba y manera a palabra den e protocol di 2018, no a bin cu mas proyecto PPP (public private partnership).

Segun Minister di Finanzas den e splicacion di Presupuesto 2021, por mira e landspakket den varios area di e presupuesto. Pero no ta cla si cua actividad concreto y cua ta e suma presupuesta pa ehecucion di e landspakket. E forma con a hinca Presupuesto 2021 den otro y e facilidad pa por les’e a keda mehora, aunke cu CAft ta kere cu mester mas informacion riba e tipo di medio financiero y tipo di costo cu mester ta miho describi.

Landspakket ainda no ta completamente ehecuta

Di otro banda no por a specifica e activdadnan, ya cu e agenda di ehecucion di e landspakket ainda ta den proceso. Pues, no por inclui obligacion of calculacion den Presupuesto 2021 tanten cu e elaboracion di e agenda bilateral ta den desaroyo ainda. Como tal lo ahusta Presupuesto cu un cambio presupuestario segun cu yega na puntonan concreto.

En todo caso lo tene cuenta cu a hala atras di reduccion di loonbelasting of ta introduci aumento di belasting otro bamcinda pa medio di un reforme presupuestario integral. Aruba ta scohe pa e ultimo, pero mester ehecuta esaki den un periodo despues.

E gastonan di producto y servicio mester keda na nivel di 2020 y lo sigui e palabracionan di e landspakket ( cu ta pidi pa hinca esakinan den un solo pakete, pa centralisa compra di producto y servicio).

Locual a haci ta pone un base pa e medidanan di sosten social, segun e cifranan di 2020 y baha e presupuesto pa e areglo di subsidio di salario. Mester ta mas specifico cua ta e substitucion entre e areglo di subsidio di salario y e areglo di desempleo.

Eigen bijdrage AZV

Manera a ilustra, Gobierno ta mantene e reduccion di 60 miyon florin pa AZV y ta bay aplica e contribucion propio. Organo Ehecutivo di AZV a aplica su plan pa yega na e meta aki, pero a bin un tension entre e mantencion di nivel di cuido y reduccion di gasto. E sector di cuido ya a expresa su desatisfaccion. Pero Minister di Finanzas ta splicac cu lo keda mantene e reduccion. Asina mes Gobierno mester duna AZV un suma di 84.3 miyon florin pa cubri e buraco cu ta keda. Lo syncronisa e introduccion di contribucion propio den cuido di salud cu e agenda di ehecucion manera describi den e landspakket. Pues, for di e splicacion di e ley di Presupuesto 2021, lo sigui cu e recomendacion aki, cu ta e combenio riba e reformanan den e sector di cuido.

Lo amplia riba e splicacion di Presupuesto 2021 y e reaccion di Raad van Advies den proximo edicionnan. Mester bisa cu te ainda Parlamento no tin fecha pa trata Presupuesto 2021.