Diasabra atardi cantidad di pasahero mester a confronta un situacion fastioso na nan yegada den nos aeropuerto.
Tur cos ta indica cu varios vuelo a yega pareu locual a ocasiona cu a presenta un stagnacion grandi tanto den e seccion di Inmigracion como esun di e sala di yegada caminda Duana ta opera tambe.
Bon Dia Aruba a tuma contacto cu vocero di Triple A, sr. Hendrik Croes kende a bisa cu tanto na bispo di Pasco como riba dia 25 di december mes, aeropuerto den su totalidad no tabatin dianan hopi druk . Nos a purba tuma contact cu hefe di Inmigracion na aeropuerto pa busca mas informacion riba kico berdaderamente por a sosode diasabra ultimo, si nan tabatin suficiente personal durante e dianan di fiesta aki pa asina atende cu e fluho grandi di pasaheronan.
Ya cu si nan no tin suficiente personal extra pa atende cu e bishitantenan y e vuelonan ta yega pareu manera a sosode diasabra atardi, ta wordo presenta e situacion fastioso aki cu sigur no ta bon pa nos turismo.
