Fast Ferry tabata un di e proyectonan mas popular cu minister di Comunicacion, Transporte y Sector Primario Chris Romero a bin presenta algun tempo pasa pa loke ta trata desaroyo entre isla di Aruba y Corsou pero door di diferente situacionnan esey no por a wordo concretisa.
Durante un ultimo conferencia di prensa Bon Dia Aruba a puntra pa minister Romero con a para cu e proyecto aki mirando cu for di basta tempo no a tende mas nada di dje, pa cu esaki, el a contesta cu actualmente nan a drenta den tres aña y mey di gobernacion pero esaki ta un idea for di 2013 cu tabata eynan ora e tabata den parlamento.
21 di december di aña 2018 nan a logra sinta hunto cu e minister di Economia Steven Martina di Corsou na unda un Memorandum of Understanding (MoU) a wordo firma pa bira e proyecto mas oficial, na aña ey cu tabata supone cu e proyecto lo a cuminsa cana na 2019, minister Martina a haya diferente retonan y e mester a baha, loke a pone cu e proyecto entre Aruba y Corsou no por a sigui cana y esun cu a follow up tabata full un otro cos, segun loke minister Romero a indica loke mester a cuminsa full di nobo y nan no tabata mucho na haltura di esey, loke a nifica cu e proyecto a para full na 2019.
Minister Romero a indica cu pa ora cu nan kier a cuminsa back e pandemia di Covid-19 a drenta, asina mes el a indica cu tabatin y ainda tin interesadonan pero a bin diferente circunstancianan, cu e mes a sigura cu nan sa den ki situacion nan ta na e momentonan aki.
“E proyecto ta eynan keto bay, e ta un posibilidad cu nos kier haci pa futuro, pero circunstancianan a pone cu tin un retraso aworaki” minister a finalisa.
Ademas, Gobierno di Aruba a anuncia cu pa e proyecto aki nan lo pone disponibel algun tereno di refineria na unda nan a sondea tur posibilidad segun estudionan di factibilidad cu a wordo realisa caba pa por mira cu e area adecua pa desaroya e Fast Ferry tabata na San Nicolas.
