Mientras tur partido tabatin un fin di siman largo pa reflexiona despues di e shock cu e caida repentino di gobierno a ocasiona, atencion awor ta riba fecha di eleccion. Nos ta na menos di 12 siman di e dia ey y ta surgi tur tipo di pregunta, di ken ta bay cu ken ainda, te na ken no lo participa mas. Tambe pregunta tocante kico partidonan lo bay trece dilanti como punto clave den nan programa cu cual nan kier gobierna entre 2021 y 2025.

Un pregunta cu no a scucha, y cu si mester un respuesta, ta: hala e fecha di eleccion mas cerca tabata algo sensato pa haci, tumando na cuenta ‘interes general’? Kico por ta e beneficio cu e ciudadano en general por tin cu eleccion tres luna mas tempran? A primera vista, nos no ta mira un valor agrega, pasobra si vota segun e fecha regular estableci caba, nan evaluacion di e partidonan politico lo ta igual. Di otro banda, si resulta berdad cu cierto partido nobo lo no por a keda cla cu nan preparacion legal pa por registra como partido politico y participa, si den e proceso normal anticipa nan lo a logra, anto por hasta bisa cu a limita e escogencia pa e ciudadano den e sentido aki. No ta bay pa e hecho cu ta trata di un partido nobo cu quizas no ta logra un o mas asiento, ta bay simplemente pa e derecho di participa.

Pero interes general tin mas aspecto, por ehemplo relaciona cu e pandemia y e esfuerzonan pa limita su efectonan, entre otro cu e plan di vacunacion. Nos no ta bay discuti e pro y contranan di vacunacion mes, esey cada ken dicidi pa nan mes. Pero como gobierno bo tin e meta pa percura cu lo tin un situacion mas sigur posible pa pueblo por bay vota. Y cu nos no mester subestima e asunto aki, nos por mira den e dianan aki na e hermana isla, unda despues di eleccion a surgi un brote enorme di Covid-19, cu un relacion cla cu e campaña electoral y festividadnan despues di e resultado. Den e sentido aki ta importante pa contempla e problemanan cu nos ta bay enfrenta, bayendo pa dia di eleccion, y e forma con pa organisa eleccion mes di tal forma cu nos ta limita e riesgonan cu nos ta termina cu un situacion manera na Corsou.

Mester cuminza anto cu contesta e pregunta: “Cu tres luna menos di preparacion, con leu nos lo ta cu vacunacion, pa garantiza maximo seguridad na e ciudadania? Den e contexto aki, tabata responsable pa hala e fecha di eleccion mas cerca, mientras nos pais ta meymey di un pandemia ainda? Nos por comprende e argumentonan (politico) di e partido grandi demisionario pa baha gobierno, aunke no necesariamente mester comparti esey, pero nos no a tende nada ainda con ta bay actua pa gana mas tempo den e programa di vacunacion, pa por brinda eleccion den un ambiente mas sigur posible. No ta esey ta loke interes general ta exigi di cualkier gobierno? En todo caso, manera e asunto ta awor aki, ainda tin e preguntanan clave pa contesta. Manera: nos ta bay por vota durante varios dia, manera tabata e caso na Hulanda? Ta bay habri mas urna pa limita e cantidad di votador cu mester acudi na cada urna? Hopi di e lugarnan di votacion ta na un scol, cu un cierto tamaño di klas cu ta duna su limitacion pa presencia di hende durante votacion y posterior conteo di voto.

En todo caso nos sa awor caba cu no ta bay tin votacion via medio electronico. Pa cuminza nos ta laat pa organiza algo asina, ademas cu gobierno ta carece di e fondonan pa haci esey. Ademas, nos por mira na varios pais grandi cu confianza den medionan digital no t’ey pa laga e sistema di vota riba papel cay por completo. Con ta bay maneha esaki?

Ta di spera cu pronto lo bin claridad den kico ta permiti y kico no na e partidonan politico durante campaña. Mester ta mas cu cla cu ta bon posible campaña na distancia, sin necesidad di bishita personal na cas, cu ta aumenta e riesgo di plama e virus. Esaki no ta conta solamente pa e candidatonan so, pero pa tur otro forma di busca contacto fisico cu votadornan durante campaña, por ehemplo a traves di e structura di representante den bario, cu principalmente e dos partidonan grandi tin. No por exclui e posibilidad cu e tipo di bishita aki, cu ta casi imposible pa autoridadnan haya control ariba, a hunga un papel den e brote desastroso cu a surgi na Corsou. No ta necesario campaña cu partimento di bandera, t-shirt, etc. y cu acompañamento di musica y un cantidad di simpatizante. Esaki ta e oportunidad pa tur partido politico mustra nan sentido di responsabilidad y bira creativo cu uso di medionan digital. Si na Merca Biden por a keda sinta den su basement y mobilisa mas di 80 miyon votador, anto den nos situacion esey tambe mester ta posible. Ta keda e pregunta di semper: atrobe nos lo mira e tradicional abuso di medio di gobierno, principalmente vehiculo y personal, cu supuestamente mester ta trahando, pa interes general…