Recientemente, Bon Dia Aruba a combersa cu Sandy Willems, persona encarga cu e Centro di Control di Cacho. Durante e combersacion aki, Willems a menciona e cantidad di persona cu ta cria cacho di rasa pa bende na Aruba, y con esaki ta contribui grandemente na e cantidad grandi di cacho cu ta termina sea riba caya, den Animal Shelter, of eutanasia.

Riba cualkier website di compra y benta riba rednan social por nota cu frecuentemente tin puppies di rasa na benta. Actualmente na Aruba no tin ningun registro di criadornan di cacho (‘breeders’). Tampoco tin ningun regulacion riba esaki, loke ta nifica cu cualkier persona por pone un cacho hembra sali na estado cuanto biaha cu kier, y bende e puppies sin ningun restriccion. Tampoco tin ningun tipo di campaña di educacion nacional riba e problemanan genetico cu cacho di rasa ta presenta, ni e maltrato cu hopi biaha e cachonan aki ta sufri den criadero.

Problema di cacho riba caya
 No ta un secreto cu na Aruba tin un problema grandi di cacho. Sea nan tin cas pero nan ta sali riba caya, causando molester y tin biaha hasta atacando hende; of ta bira victima di negligencia, maltrato y abandono. E actonan aki ta asina comun, cu a introduci algun medida pa purba di combati esaki. Por ehemplo, a introduci e Ley di Cacho, cu ta stipula e obligacionnan cu un doño tin pa su cacho, entre otro, cu e no mag ta riba caya. Sinembargo, pa falta di personal di polis, entre otro problema, e implementacion di e ley aki ta hopi abao.

Ademas a inaugura e Centro di Control di Cacho pa hende por trece un animal ora nan no por cumpli mas cu nan responsabilidad. Aki ta practica eutanasia riba pushi y cacho cu a wordo bandona. Segun fundacionnan defensor di bienestar animal, na Aruba ta bandona entre 4mil pa 10mil animal (pushi y cacho) cada aña. Esaki ta causa cu tin cantidad di e animalnan aki cu ta riba caya sin cuminda, awa, of cuido medico necesario.

Problema di cacho di rasa
 E problema cu cacho di rasa tin varios aspecto. Manera menciona, e falta di regulacion ta nifica cu hopi biaha criadornan di cacho ta abusa di e animalnan door di pone nan pari demasiado frecuentemente, loke por tin consecuencia fatal. Ademas, e personanan cu ta cria cacho ta den un forma di bisa un comerciante, pues nan interes ta pa placa y no ta tene cuenta si e ‘mercado’ ta satura. Esaki ta nifica cu no ta tene cuenta cuanto cacho tin caba na Aruba, sino ta sigui cria mas. Cachonan di rasa tambe ta wordo bandona unabes nan bira grandi, of ‘problematico’, of cualkier otro motibo pa cual hende ta dicidi di bandona un animal.

E otro problema cu cacho di rasa ta genetica. Un estudio publica na 2018 den e Asociacion Mericano di Medicina Veterinario a descubri cu cachonan sin rasa tin menor chens di desaroya malesa genetico compara cu cacho di rasa. E estudio a examinda DNA di 83mil cacho sin rasa y 18mil cacho di rasa, representando 330 rasa, tipo y variedad.

Tambe mester tene cuenta cu e variedad genetico dentro di un poblacion chikito, loke ta e caso ora na un isla manera Aruba, e mesun cacho ta haya cantidad di puppies.

Regulacion
 Segun Willems, loke ta necesario ta introduccion di regulacion riba criamento di cacho. Por ehempel, mester bin un registro di criadornan cu licencia. Pa ricibi e licencia, e criador mester pasa un curso di capacitacion pa atende cu e necesidadnan di e cacho na momento cu e ta sali na estado, como tambe na momento di e parto y e cuido di e puppies.

Ademas mester duna aprobacion pa cria puppies dependiendo di e cantidad di puppies cu a cria caba, y dependiendo di e poblacion di cacho na Aruba. Di e forma aki por controla e cantidad di cacho cu tin riba nos isla. Ademas, mediante e licencia ta controla e criadornan pa sigura cu nan ta responsabel di nan animal, y cu e puppies ta bay na doñonan cu por carga e responsabilidad aki.

Educacion
 Sinembargo, lo mas urgente ta un campaña di educacion. Comunidad mester bira consciente cu un cacho (of cualkier mascota) ta un ser bibo cu tin derecho, y cu e doño ta carga un responsabilidad completo pa e animal. Ademas mester conscientisa riba e hecho cu un cacho no ta un animal facil pa cuida, y gastonan por bira grandi na momento cu e animal bira malo.

Mester educa comunidad tocante cacho di rasa. Hecho ta cu cacho di rasa no tin ningun bentaha di inteligencia, comportamento ni salud riba un cacho ‘crioyo’. Maske ta berdad cu cachonan di rasa ta wordo cria pa presenta cierto caracteristica, e realidad ta cu teniendo consideracion cu e mutacionnan genetico ariba menciona, e chens pa un cacho di rasa desaroya un malesa genetico, y un cu por afecta su capacidad cognitivo, ta mas halto cu un cacho no di rasa.

Pues comunidad mester bira consciente di e efecto cu cria, bende y cumpra cacho di rasa tin riba e problematica di cacho riba caya na Aruba, y contribui na bira parti di e solucion.