Menos di un ora despues cu gabinete Wever-Croes I a entrega su retiro, convertiendo asina den gobierno demisionario, habitantenan por a tuma nota cu e partidonan politico mayor a cuminsa cu campaña electoral agresivo.
Esaki despues cu prome minister encarga, Evelyn Wever Croes a anuncia intencion di adelanta eleccion general na Aruba. Informacion cu ta circula ta indica cu ta pensa di cambia e fecha original na september, adelantando eleccion pa luna di juni, maske Wever-Croes den su conferencia di prensa no a admiti ni rechasa esaki. Ainda no a anuncia ningun cambio oficial na e fecha di eleccion.
Inmediatamente a tuma nota cu partido AVP a tene un reunion grandi na cas di partido. “Nos ta haya e mensahe di awe manera un bendicion di no s creador”, lider di partido AVP, Mike Eman, a expresa na un grupo di siguidonan di e partido aki cu a reuni na cas di partido. “Pa libra Aruba di e gobierno di mas malo cu nos a yega di conoce!”
“Y pa tur esnan cu no a nace riba e pais aki, boso mester sa cu partido AVP ta partido cu ta mira cada un como prohimo, y cu cada un ta yuda sirbi e pais aki,” el a declara mientras su sostenedonan tabata aplaudi.
Cu e accion aki por conclui cu campaña electoral 2021 a cuminsa agresivamente, y por spera accionnan similar di otro partidonan den dianan binidero.
