COHO, e organo di Reforma y Desaroyo lo continua cu un adaptacion den e rijkswet y Aruba lo mester sigui traha segun e landspakket palabra pa por sigui ricibi sosten di likides. Asina Secretario di Estado Raymond Knops a informa Tweede Kamer ayera.
Gobierno di Reino a bay de acuerdo ayera pa Aruba por desvia un biaha mas di e normanan presupuestario cu a stipula den e protocol di 2018. Esaki pa motibo di e efectonan di e pandemia di COVID-19.
Den un carta amplio, Raymond Knops a splica Tweede Kamer cu Aruba a yega na un acuerdo cu Hulanda pa e landspakket di forma pa por ricibi e sosten di likides. E meta di e landspakket ta pa haci Aruba resiliente riba terenonan di finanzas publico, economia, institucional y di sociedad, pa asina por wanta e proximo sla manera COVID-19 independientemente di Hulanda.
Gobierno di Reino a dicidi cu aunke cu por desvia di e normanan presupuestario, ta mantene si e sistematica di 2020, unda ta permiti Aruba na un saldo financiero maximo, y cu banda di e sosten di likides cu Hulanda ta bay sigui duna, Gobierno di Aruba lo por suplementa esaki cu prestamonan. Ainda no a haci un calculacion concreto riba e sosten di likides total cu lo mester. CAft lo mester stipula esaki, Knops a bisa den su carta. Tanten lo evalua e sosten a base mensual, segun e reportahenan mensual.
Agenda di ehecucion ta den ‘ehecucion’
Prome Minister Evelyn Wever Croes y Raymond Knops hunto a determina e agenda di ehecucion pa e landspakket riba prome di Februari 2021 y den e reunion di Conseho di Minister di Reino a determina caba cu e progreso riba e agenda di ehecucion ta mara na otorgamento di e siguiente tranche di sosten di likides. “Aruba ta cumpli suficientemente cu e condicionnan stipula pa e di dos, di tres y di cuater tranche cu ta nifica cu por otorga e sosten financiero,” Knops a skirbi den su carta.
CAft a calcula cu e necesidad financiero di Aruba ta 237 miyon pa e di dos kwartaal di 2021. Entre otro Gobierno di Reino a bay de acuerdo pa presta 20 miyon florin cu Aruba mester paga na bononan den e periodo aki. Si mester bolbe saca bononan riba mercado na 2021, sinembargo, Gobierno lo mester paga e 20 miyon mesora na Hulanda. Ademas Gobierno Hulandes a dicidi, cu unabes cu Aruba a firma e di dos agenda di ehecucion, pa otorga e 237 miyon florin pa e di dos kwartaal di 2021.
Lo traspasa e suma aki den e di dos kwartaal, y consecuencianan di e di cinco tranche aki lo keda presenta den un ley di presupuesto complementario na Tweede Kamer. “No por warda pa un autorisacion formal di Tweede y Eerste Kamer,” Knops a sigui splica.
Progreso agenda di ehecucion
E prome agenda di ehecucion di Aruba tabata pa lunanan Februari y Maart 2021 cu ta un periodo relativamente cortico. E periodo aki tabata particularmente den luz di introduccion di e departamentonan cu ta bay ta envolvi cu e landspakket di ambos banda di oceano, Raymond Knops a splica e Parlamentarionan Hulandes. “E tempo tabata pa instala e gruponan di trabou y structuranan di intercambio, palabracionnan di trabou y establece e plannan comun pa ehecucion. No a logra tur e deadlines segun e planificacion. Ponemento di e structura di un colaboracion multianual entre e paisnan ta costa mas tempo cu a premira den algun caso. Den e situacionnan ey a adapta e deadline of a pasa esakinan pa e siguiente agenda di ehecucion.”
Pero Raymond Knops a bisa cu Aruba en general ta cumpli cu e palabracionnan stipula den e prome agenda di ehecucion, unda entre otro a entrega documentonan palabra na tempo.
Maneho financiero
A haci palabracionnan riba pone prioridad riba leynan cu mester keda adapta pa fortifica finanzas publico y a entrega un plan di investigacion pa haci un asina yama ‘gap-analisis.’ Esaki ta encera comparacion locual ta e produccion desea versus locual ta produci den realidad. E analisis lo ta specificamente riba e aspecto organisatorio di finanzas publico. E palabracionnan mester keda profundisa y ta pasa pa e di dos agenda di ehecucion. Tambe a bin cu un diseño di investigacion pa e revisa e funcion di compra di producto y servicio, y e analisis ta tumando luga. E resultadonan mester ta cla pa 15 di April.
Costo y efectividad sector publico
E condicionnan pa e di tres tranche di sosten di likides tabata e cuadro legal pa maximalisacion di e condicionnan laboral di funcionarionan halto denter di e sector (semi)publico. E concepto di ley Normering Topinkomens, LNT, ta den procedura y a base di conseho di Raad van Advies a haci algun pregunta na Hulanda, cu a conduci cu ta bay un analisis comparativo entre e Corsou, St. Maarten y Aruba. Na momento cu e resultado ta conoci, lo determina e LNT.
Na momentonan aki ta preparando un investigacion independiente na e condicionnan di trabou pa mandatarionan y ambtenaar, na tur tres e paisnan menciona. E investigacion aki mester resulta den un bista y analisis comparativo di e total na condicionnan laboral primario, secundario y tercero. Aruba ta den proceso pa haci un destaho publico pa e trabou aki, pero pa motibo di trayecto cu ta rekeri mas oferta, a bin retraso. Como tal a pone un fecha nobo den e di dos agenda di ehecucion.
Trabounan pendiente
A cuminza cu busca e posibilidad pa crea un pool di specialistanan den legislacion pa Corsou, St. Maarten y Aruba pa fortifica e funcion di legislacion. Ademas Aruba a entrega su plan di acercamento pa revisa e funcion di Recurso Humano.
Pa loke ta belasting, no ta necesario pa haci mas investigacion, ya cu IMF entre otro a haci esaki, y locual mester ta decision riba e cambionan di e sistema di belasting (red. manera ta conoci, IMF ta recomenda introduccion di Value Added Tax of BTW). E ta implica un structura di belasting nobo, adaptacion di organisacion di belasting y automatisacion. E di dos agenda di ehecucion lo inclui e acuerdonan riba un scenario cu e BTW, leynan y accionnan cu mester sigui.
IMF tambe a haci un revision di e sector financiero y a base di esaki lo bin un sistema legal di garantia di deposito y pa contraresta labamento di placa y financiamento di terorismo.
E reformanan economico cu ta inclui analisis pa cambio di ley pa mercado laboral ta bay pa e di dos agenda di ehecucion, mescos ta e investigacion riba clima di inversion.
Knops a informa Tweede Kamer cu Aruba ta prepara pa tuma e encargo pa ayudo di cuminda, y a traha su plan. Hulanda y Aruba ta den combersacion riba e contenido.
Pa loke ta cuido, ta sigui busca colaboracion entre hospitalnan di e paisnan, y un grupo di investigacion ta buscando forma pa yega na un structura di cuido cu ta sostenibel. Locual si ta keda vigente ta cu mester corta 60 miyon florin na gastonan pa cuido.
Pa ta enseñansa, ya caba a inicia un revision y a haci palabracionnan pa e di dos agenda di ehecucion.
Knops a bisa cu pa loke ta refuerso di e estado di derecho, Aruba a tuma e pasonan na serio, incluso un acuerdo pa reemplasa material di Kustwacht y continuacion di e Sociaal Vorming Traject na Marinierskazerne.
Lek conseho Raad van State y St. Maarten
Raymond Knops a bolbe expresa su desapunto cu a lek e conseho di Raad van State riba e rijkswet COHO. El a informa Tweede Kamer cu unabes cu yega na un acuerdo cu e nader rapport, esta unda ta inclui e conseho di Raad van State den e ley, e lo amplia riba dje. En todo caso, Knops ta rechasa e ponencia cu COHO ta contra Statuut y cu Raad van State no a bisa esaki explicitamente. “Tin hopi luna ta trahando hunto caba a base di e landspakket y a haci logronan caba,” ta locual e Secretario di Estado, Raymond Knops bisa Tweede Kamer den un carta separa, agregando cu e nader rapport y ahustacion den e rijkswet ta conta cu sosten di e Prome Ministernan di e paisnan envolvi. E intencion ta pa pasa e rijkswet COHO prome cu Juli 2021.
Pa ta St. Maarten, e pais lo no ricibi su di cinco tranche di sosten di likides tanten cu no bin claridad riba e keho cu a haci na Nacionnan Uni contra Hulanda.
