Departamento di Salubridad Publico DVG a informa den su resumen diario tocante e desaroyonan di pandemia di Covid-19 na Aruba, cu ayera a registra 618 caso activo.
DVG informa cu ayera a registra un total di 88 caso nobo di Covid-19, di cual 4 no ta residente. Cu esaki, e casonan activo pa ayera tabata 618. Riba e grafico adhunto por nota e tendencia di aumento di e ‘curve’ di casonan activo. Cu esaki por nota cu e asina-yama ‘tercer ola’ di coronavirus riba nos isla ya ta alcansando e peak di e ‘segundo ola’, cu tabata 624 caso januari ultimo.
Ademas, DVG a informa cu e cantidad total di test ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 852 test. Cu esaki e tasa di positividad (‘positivity rate’) entre nos residentenan ta 25%.
E cantidad di fayecido relaciona cu Covid-19 ta 82.
Di su banda, Hospital Dr. Horacio Oduber a informa cu tin un total di 40 persona interna, di cual 13 ta den Cuido Intensivo y 27 riba unidad general di covid.
